Големите флуктуации на берзите може да ве натераат да се загрижите за вашите инвестиции.
Меѓутоа, ако го земете примерот на Ворен Бафет, кој успева да собере милијарди долари лично богатство преку инвестиции, дневните флуктуации на цените на средствата не треба да ве загрижуваат.
„Кога купувате акции, треба да бидете подготвени да поевтинат 50 или повеќе проценти и да не сте загрижени за направената инвестиција“, рече извршниот директор на Berkshire Hathaway на годишниот состанок на акционерите на компанијата во 2020 година.
Бафет (91), чие богатство се проценува на 109,2 милијарди долари, многумина го сметаат за најголем светски инвеститор. Всушност, од 10-те најбогати луѓе во светот, Бафет е единствениот што го зголемил своето богатство од почетокот на годината, според индексот на милијардери на Блумберг.
Кога Бафет гледа на пазарот на капитал, тој гледа компании, а не акции.
„Игнорираме 99,9% од работите што ги гледаме, иако ги читаме. Одвреме-навреме гледаме нешто што е привлечно за она што мислиме дека е бизнис“, рече Бафет на Генералното собрание на Berkshire Hathaway во 2008 година.
Еве некои од основните принципи на Бафет кои би можеле да се интегрираат во секоја инвестициска практика:
Размислувајте долгорочно
Кога Бафет купува акции, инвестицијата е долгорочна.
„Ако има еден квалитет што ви треба за да инвестирате како Ворен Бафет, тоа е трпение“, изјави за CNBC Роберт Џонсон, акционер на Berkshire Hathaway и професор по финансии на Универзитетот Крејтон во Омаха, Небраска, каде што живее Бафет.
Милијардерот инвеститор ја користеше оваа стратегија низ годините. „Кога ќе купиме акција, ќе бидеме задоволни со купувањето, дури и ако ни кажат дека пазарот ќе се затвори за неколку години. Ние го гледаме бизнисот“, рече Бафет.
Инвестицијата ја споредува со купување фарма. „Нема да ја гледате цената на акцијата секој ден и нема да прашувате дали приносот е малку над или малку под очекувањата. Ќе видите што ќе произведе оваа фарма со текот на времето“.
Инвестирајте во работи што ги разбирате
Бафет вели: „Никогаш не инвестирајте во бизнис што не го разбирате“.
„Морате да научите како да ги оценувате компаниите и да знаете кои од нив се во ваша компетенција, а кои се надвор од неа“, изјави Бафет за CNBC во 2019 година.
Тоа не значи дека тој смета дека инвеститорите треба да бидат експерти за активностите на секоја компанија. Инвеститорите мора да имаат „способност да ги вреднуваат соодветно избраните компании“, напиша тој во писмото од 1996 година до акционерите на Berkshire Hathaway.
Фокусирајте се на добри компании
Бафет сака да се фокусира на компании кои имаат добар бизнис, односно модел кој е одржлив на многу долг рок, рече Џонсон.
Инвестицијата мора да биде по вистинска цена. Бафет е познат по тоа што инвестира во вредност, или со други зборови, избира акции за кои тој верува дека се тргуваат по цена што е пониска од нивната внатрешна вредност.
„Многу е подобро да се купи одлична компанија по добра цена отколку добра компанија по одлична цена“, напиша тој во писмото од 1989 година до акционерите.
Не престанувајте да учите
Бафет силно верува дека човек не треба да престане да учи нови работи во текот на животот. До својата 10-та година, ги прочитал сите инвестициски книги во Јавната библиотека во Омаха, а некои од нив двапати.
Бафет не запира после тоа. „Бев во неговата канцеларија пред неколку години. Неговото биро беше преполно со книги на различни теми “, вели Џонсон.
Бафет посочи дека чита околу 500 страници неделно. „Јас силно ја поддржувам идејата дека треба да се чита сè што доаѓа пред очи“, рече Бафет на Генералното собрание на Berkshire Hathaway во 2007 година.
