Како овој град на југот на Шпанија ги брани своите жители од коронавирусот

155

Специфичната положба (високо на брдо) жителите на градот Захара де ла Сиера ја користеле како предност пред непријателот. Градот на југот од Шпанија денес, успешно се бори и против коронавирусот.

Иако во околината на областа има инфицирани, ниту еден од 1.400 жители на овој андалузиски град не е позитивен на Ковид -19. За многумина оваа ситуација е благодарение на стриктните мерки кои ги вовеле локалните власти.

До градот водат пет улици, а четири се затворени од 14 март годинава по налог на градоначалникот Сантијаго Галван. Забранет е влез за сите странци.

Галван вели дека првите неколку дена морал да одбие неколку Французи и Германци кои сакале да влезат во градот, без да знаат за нивните ригорозни мерки.

Единствената отворена улица којашто води до градот е наменета за локалното население и е под постојан надзор. Секое возило се дезинфицира, а два пати неделно се дезинфицираат сите улици, плоштади и фасади на куќи во градчето.

Градот сака да ги заштити своите жители, а особено оние постари од 65 години кои сочинуваат четвртина од популацијата на Захара де ла Сиера. Затоа, локален претприемач вработил две лица кои им доставуваат храна и лекови на најзагрозените членови на заедницата. Никој не излегува од своите куќи, освен ако не е апсолутно нужно.

Опстанокот на економијата на Захара де ла Сиера зависи од неколку семејни бизниси. Затоа, градот од својот буџет ќе ги покрие нивните трошоци за електрична енергија, вода и даноци за време на пандемијата на коронавирус.

Фото: Facebook