Кина најави историски чекори за стабилизирање на својот проблематичен сектор на недвижности, при што централната банка обезбеди дополнително финансирање од 126,8 милијарди евра и ги олеснува правилата за хипотекарните заеми, а локалните власти купуваат некои од становите.
Инвеститорите посакаа мерки за поодлучна интервенција на државата за да се надомести намалената побарувачка за нови и стари станови, да се забави падот на цените и да се намали се поголемиот број непродадени станови. Аналитичарите, исто така, долго време ја повикаа владата да продолжи со купувањето за да го поддржи секторот на недвижности, кој на својот врв сочинуваше една петтина од кинескиот БДП и останува голем товар за втората по големина економија во светот.
Од 2021 година, кога започна големиот пад на пазарот на недвижности, многу градежни претприемачи завршија во банкрот, што ја прекина работата на многу градилишта и ја поткопа довербата во омилениот штеден инструмент на кинеските граѓани со децении.
China Real Estate Newspaper, публикација што ја води Министерството за домување, рече дека строгите мерки означуваат значаен историски момент за секторот. Министерството најави дека локалните власти можат да им наложат на државните компании да купат станбени недвижности по разумни цени, пренесува Хина.
Тие имоти ќе бидат искористени за обезбедување на прифатливи станови, рече кинескиот вицепремиер Хе Лифенг, без да даде детали за временската рамка или целниот износ на купувањата. Тој рече и дека локалните власти, кои веќе имаат долгови од околу 8,27 милијарди евра, можат да го откупат земјиштето продадено на претприемачите, ветувајќи дека властите ќе се борат напорно за завршување на закочените проекти.
Цените на новите станбени недвижности во април паднаа 10-ти месец по ред, за 0,6 отсто во однос на март, што е најсилно од ноември 2014 година.
Одделни податоци на Кинеското биро за статистика покажуваат дека инвестициите во недвижности во првите четири месеци од оваа година паднале за 9,8 отсто во споредба со истиот период лани. Во истиот период, продажбата на недвижности по површина е намалена за една петтина на годишно ниво, а бројот на започнати нови работи, по површина, е намален за речиси четвртина. За четвртина се намалени и средствата добиени од градежните претприемачи, објави Кинескиот завод за статистика.
