Сезоната на патувања би можела да започне порано на пролет и да заврши на есен, бидејќи климатските промени влијаат на навиките на туристите, објави најголемиот германски тур-оператор TUI.
Главниот извршен директор на TUI, Себастијан Ебел, даде свои размислувања за идната насока на компанијата во време на летото обележано со екстремни временски услови низ јужна Европа и откако објави дека компанијата може да се соочи со трошоци од 25 милиони евра поврзани со шумските пожари во Родос, Грција.
Тоа ја поттикна компанијата да размисли за воведување осигурување за своите клиенти кои патуваат до дестинации кои би можеле да бидат погодени од настани поврзани со климатските промени, како што се шумските пожари, рече Ебел.
Сезона до крајот на годината?
Но, климатските промени може да донесат и придобивки за тур-операторите, продолжувајќи ја сезоната и отворајќи нови дестинации. Ебел истакна дека ТУИ патува во Грција до средината на ноември, но дека ги прашал своите колеги дали можеби треба да ја остават сезоната отворена до крајот на годината – до или по Божиќ.
Тој додаде дека фокусот ќе биде ставен на новите дестинации во нордиските земји, бреговите на Белгија и Полска бидејќи туристите бараат поладна клима.
„Тоа ни дава повеќе можности да растеме“, рече тој.
