Според извештајот на Обединетите нации, климатските промени веројатно ќе донесат ризици по безбедноста и здравјето на повеќе од 70 отсто од светската работна сила.
Меѓународната организација на трудот (МОТ) во понеделникот оцени дека се заканува „коктел од опасности“. МОТ, која е дел од ОН, проценува дека 2,4 од 3,4 милијарди работници во светот се веќе изложени на прекумерна топлина во одреден момент од нивното работно време. Ова е особено точно за луѓето кои работат во земјоделство или други занимања на отворено.
Според организацијата, речиси 19.000 луѓе годишно умираат од ефектите на прекумерната топлина за време на работата. Најголема опасност е топлината и УВ зрачењето, јави ДПА.
Работата за време на екстремни временски услови е исто така проблем, на пример за рибарите, но и за работниците за итни случаи и тимовите за чистење при катастрофи.
Луѓето кои работат на отворено исто така се повеќе изложени на ризик од паразити кои се шират на поголеми области поради климатските промени.
Веќе е препознаена врската помеѓу климатските промени и одредени болести, како што се ракот на кожата, кардиоваскуларни или респираторни заболувања, како и макуларна дегенерација, која може да доведе до губење на видот.
