Меѓународниот монетарен фонд (ММФ) очекува дополнително да ја намали прогнозата за раст на светската економија оваа година, поради низата кризи кои би можеле да доведат некои земји во рецесија. Според агенциите, ММФ по трет пат годинава би ја намалил прогнозата.
Тие во април ја намалија прогнозата за оваа година за речиси цел процентен поен, на 3,6 отсто. Истата стапка на раст во моментов се очекува и во наредната година.
Портпаролот на ММФ Гери Рајс рече дека проценките продолжуваат да покажуваат раст на глобалната активност, „но некои земји можеби се на работ на рецесија“.
Според него, очекуваниот пад е резултат на тековната војна во Украина, осцилацијата на цените на суровините, многу високите цени на храната и енергијата, неочекуваното силно забавување на кинеската економија и зголемувањето на каматните стапки во голем број развиени економии.
Тој не ги објасни детално изгледите за Кина.
„Сведоци сме на криза на топење и комбинација на сите овие трендови кои одат во иста насока на конкретизирање на ризикот од побавен раст“, рече Рајс.
Тој додаде дека е јасно дека тоа се случило преку работи кои би можеле да го поттикнат ММФ дополнително да ги намали своите прогнози.
„Многу се случија и сè уште се случуваат со голема брзина откако ги објавивме прогнозите последен пат“, рече Рајс.
Според редовниот распоред, ММФ треба да објави ажурирани прогнози во средината на јули.
Светската банка ја намали прогнозата за растот на светската економија оваа година за речиси една третина, на 2,9 отсто, укажувајќи на се потешките последици од руската инвазија на Украина.
Ден подоцна, Организацијата за економска соработка и развој (ОЕЦД) ја преполови прогнозата за раст на светската економија на три отсто, предупредувајќи дека на Европа и се закануваат најлоши последици.
