Европските авиокомпании се соочуваат со нови финансиски притисоци поради војната меѓу Соединетите Американски Држави и Иран, што предизвика зголемување на цените на горивата и дополнително ги оптовари превозниците кои сè уште се опоравуваат од последиците од пандемијата, според аналитичарите и инвеститорите.
Според нив, продолжениот конфликт на Блискиот Исток ги зголеми трошоците за водење бизнис и ја откри финансиската ранливост на некои европски авиокомпании, кои размислуваат за реструктуирање, продажба или дури и заштита од банкрот, објави Ројтерс.
Така, британскиот нискобуџетен превозник EasyJet е блиску до преземање од американски инвеститори по вредност значително пониска отколку пред пандемијата, додека латвискиот Air Baltic бара краткорочно финансирање за да избегне неплаќање, а норвешкиот Norse Atlantic спроведува стратешки преглед на своето работење.
Директорот за Европа, Блискиот Исток и Африка во консултантската фирма „Интерпат Барема Бокум“ изјави дека неговата компанија моментално работи на реструктуирање на четири или пет големи европски авиокомпании.
Меѓународното здружение за воздушен транспорт (IATA) минатиот месец речиси ја преполови својата прогноза за глобалната добивка на авиокомпаниите за 2026 година, наведувајќи ги како причина зголемувањето на цените на горивата, прекините во воздушниот сообраќај и зголемената неизвесност предизвикана од конфликтот на Блискиот Исток.
Производителот на авиони „Ербас“ исто така ја намали долгорочната прогноза за побарувачката на патнички авиони, бидејќи авиокомпаниите ги одложуваат плановите за проширување на капацитетот и го планираат растот повнимателно поради геополитичките ризици и трговските тензии.
Аналитичарите предупредуваат дека помалите превозници се особено изложени на ризик, бидејќи пониските приходи во текот на летната туристичка сезона би можеле да го отежнат работењето во текот на зимата, кога авиокомпаниите традиционално бележат најниски приходи, според „Ројтерс“.
