Lamborghini го претстави новиот Countach

36

Она што беше најавено пред неколку дена сега доби официјализација, откако Lamborghini ја претстави современата верзија на својот култен модел Countach

Наречен Countach LPI 800-4, Lamborghini го претстави новиот продукциски хиперавтомобил со ограничена серија и е дизајниран со цел да му одаде почит на еден од најлегендарните модели во историјата на италијанскиот производител. Токму на време за 50-годишнината на автомобилот, LPI 800-4 го слави оригиналниот дизајн, а притоа користи модерна технологија од Sian FKP 37, кој пак е базиран на Aventador.

И додека пропорциите на Aventador очигледно забележливи и не толку во согласност со оригиналниот Countach, карбонските панели на телото од LPI 800-4 се целосно нови, евоцирајќи ја есенијата на приказната на Countach која се протегаше речиси две децении.

Како и сите модерни Lamborghini суперавтомобили кои ја добиваа улогата на „знаменосци“ во понудата, така и овој Countach LPI 800-4 ја добива препознатливата форма, аголните површини и секако препознатливите „Ламбо врати“. На крајот на краиштата, сите овие карактеристики беа за првпат претставени со Countach LP500 прототипот дизајниран од Марчело Гандини во 1971 година кога работел за Bertone, а беа пренесени на продукцискиот LP400 кој беше лансиран во 1974 година.

Детали кои потсетуваат на оригиналнот Countach

Предниот дел со своите трапезоидни фарови, рамниот нос и правоаголните отвори за воздух се потсетник на LP5000 QV моделот од 1985 година, една од подоцнежните верзии на Countach. Истото важи и за шестоаголните сводови над тркалата а автомобилот е поставен на 20 и 21-инчни тркала со ретро изглед.

Шестоаголните задни светла се позајмени од Sian, но остатокот од задниот дел има посензибилен пристап интегрирајќи карбонски дифузер, издувен систем со четири завршетоци и кратко исечен заден браник кој открива голем дел од широките задни тркала. Нема фиксирано задно крило, а иако Lamborghini не открива ништо за активната аеродинамика, изгледа како автомобилот да има сокриен активен заден спојлер.

Хибриден систем

Како што може да се претпостави по дизајнот, Countach LPI 800-4 ја споделува архитектурата со Sian FKP 37 кој беше претставен во 2019 година. Покрај карбонскиот монокок, исто така добива и V12 мотор со благ хибриден систем со нешто помала моќност од 814 КС кои се испраќаат на сите четири тркала.

Поконкретно, тука е вообичаено природно аспирираниот 6,5-литарски V12 мотор кој е надолжно поставен и испорачува 780 КС, а работи заедно со 48-волтниот електромотор кој додава дополнителни 34 КС и е лоциран внатре во седумстепениот автоматизиран мануелен менувач. Исто како и кај Sian, енергијата од регенеративниот сопирачки систем кој се складира во суперкапацитатор кој е полесен од традиционалната литиум-јонска батерија.

Lamborghini декларира дека спринтот од нула до „стотка“ се стигнува за 2,8 секунди, за до 200 км/ч се потребни 8,6 секунди, а максималната брзина е 355 километри на час. Ова го прави Countach LPI 800-4 подеднакво брзо како Sian FKP 37 и нехибридниот Aventador LP780-4 Ultimae.

Уникатен ентериер

Кога станува збор за внатрешноста, управувачот и седиштата се исто како кај Aventador, додека контролната табла, вратите и централната конзола доаѓаат од Sian. Со цел да направат Countach да се разликува, дизајнерите на Lamborghini додадоа нови отвори за вентилација и нешто поинаков кожен трим за централниот тунел. Исто така, тука е нов 8,4-инчен екран на допир за инфозабавата, иако оваа единица изгледа доста слично како онаа кај Sian. Она што е дефинитивно уникатно за овој модел е Stile копчето кое иницира презентација на дизајнерската филозофија на автомобилот за „привилегирана публика“ како што Lamborghini ги нарекува возачот и сопатникот.

Презентацискиот автомобил има црвен и црн кожен ентериер кој зема инспирација од личниот Countach LP 400 S на Феручио – исто како и посветената Bianco Siderale нијанса на екстериерот. Секој сопственик ќе може да си го персонализира моделот дополнително со избор на цел опсег на бои за екстериерот и четири конфигурацици на ентериерот, плус дополнителни бои за патосниците, таванот и шевовите.

Автомобилот ќе биде произведен во само 112 примероци. Компанијата не откри детали околу цената, а првите испораки се очекуваат во првиот квартал на 2022 година.

Преземено од Avtoplus.mk