Три години по лансирањето на серискиот Nevera, досега се продадени 50 примероци, што е само една третина од планираните 150 примероци, изјави Мате Римац пред учесниците на конференцијата на Financial Times за иднината на автомобилите во Лондон.
Со тоа тој се осврна на резултатите од продажбата на електричниот хиперавтомобил Невера со 1914 КС, вреден два милиони евра и рече дека досега не ги исполнил очекувањата, а причината е што купувачите на хиперавтомобили сè уште сакаат да возат на бензин, пренесува Јутарњи лист.
– Почнавме да ја развиваме Невера во 2016 и 2017 година, кога струјата беше кул“, рече Римац на конференцијата. „Но, сега забележуваме дека како што електрификацијата станува „мејнстрим“, поттикната од владите, луѓето на врвот на секторот кои секогаш сакаат да бидат различни од сите други, затоа повеќе не сакаат електрични хиперавтомобили“, рече Римац.
Тој го спореди сегашниот тренд кај купувачите на хиперавтомобили со љубовта на богатите поединци за скапи аналогни часовници кои се продаваат многу повеќе од обичните дигитални паметни часовници, и покрај фактот што традиционалните часовници можат многу помалку технолошки, пишува Carscoops.
– Apple Watch може да направи сè подобро и може да направи уште 1000 работи, тој е многу попрецизен, може да го мери вашиот пулс и слични работи, но никој не би платил 200.000 долари за Apple Watch.
И како што побарувачката за скапи часовници од класична технологија не покажува знаци на забавување, или дека е надмината од страста за дигитални алтернативи, Мате Римац не гледа дека побарувачката за електрични хиперавтомобили расте, така Невера веројатно никогаш нема да добие наследник.