Американскиот производител на чипови „Qualcomm“ склучи долгорочно партнерство со „Amazon“ за развој на повеќе генерации чипови за центри за податоци со вештачка интелигенција.
Ројтерс објави дека договорот е дел од напорите на „Qualcomm“ да се прошири надвор од пазарот на паметни телефони.
Според договорот, „Amazon“ би можел да купи чипови и други производи за центри за податоци на „Qualcomm“ во вредност до 60 милијарди долари (51,6 милијарди евра).
Од друга страна, Qualcomm му додели на Amazon право да купи до 25 милиони негови акции по цена од 161,26 долари (138,7 евра) по акција.
Вредноста на тоа право се проценува на околу четири милијарди долари (3,4 милијарди евра).
Соработката ќе вклучува развој на прилагодени чипови за вештачка интелигенција, како и технологии за оптичко поврзување кои треба да овозможат поголем проток на податоци помеѓу системите во центрите за податоци.
„Qualcomm“, кој традиционално има силно присуство на пазарот на мобилни чипови, се стреми да ги зголеми приходите од својот бизнис со центри за податоци и да ја намали својата зависност од пазарот на паметни телефони, особено со оглед на очекуваното губење на дел од бизнисот со „Епл“.
Компанијата постави цел да генерира 15 милијарди долари (12,9 милијарди евра) приходи од чипови за центри за податоци до фискалната 2029 година.
Како дел од поширока стратегија, „Qualcomm“ веќе работи со „Мајкрософт“ и „Мета“ за развој на решенија за вештачка интелигенција.