Хрватскиот премиер Андреј Пленковиќ при презентацијата на државниот буџет за 2023 година во хрватскиот Сабор изјави дека ќе се создаде доволен фискален капацитет за еднократна поддршка на пензионерите не еднаш, туку неколку пати.
Хрватската влада тврди дека овогодинешните два пакета мерки, пролетниот и есенскиот, ќе ја чинат земјата 4,8 милијарди куни (643,2 милиони евра) и во следната година. Во него не се предвидени еднократните исплати кои ги спомна премиерот Пленковиќ, пишува Пословни дневник.
Најважни државни антиинфлаторни мерки и натаму се контролата на цените на горивата, како и замрзнувањето на цената на струјата и бензинот, прво за граѓаните, а потоа и за јавните институции и претпријатија. Се наведува дека на тој начин граѓаните на Хрватска се поштедени од трошоците на кои се изложени жителите на другите земји, каде цената на струјата или гасот поскапе дури и десет пати.
Вредноста на таа интервенција и само за периодот од октомври годинава до крајот на март идната година изнесува околу шест милијарди куни, што е речиси колку трошоците за изградба на два Пељешки моста.
Беше истакнато дека и при ваква силна државна интервенција, Хрватска од април се соочува со големо поскапување и инфлација која е над просекот на ЕУ. Според последните податоци, годишната инфлација во Хрватска надмина 13 отсто, а доколку малопродажните цени на струјата и гасот ги следат пазарните цени како во другите земји, хрватската инфлација веројатно би била повисока од 20 отсто, како во балтичките земји. За следната година се очекува просечната стапка на инфлација да се спушти под шест проценти.
