Моника Белучи “гостин“ на 99-годишнината од Стопанската комора на Македонија

57

Стопанската комора на Македонија утре слави 99 години, па по тој повод на прославата решиле да ја поканат големата филмска ѕвезда Моника Белучи.

“На прославата ќе бидат присутни и австрискиот канцелар, Себастијан Курц, претседателот на Србија, Александар Вучиќ, премиерот на Хрватска, Андреј Пленковиќ, поранешниот премиер на Грција, Алексис Ципрас, поранешниот претседател на Хрватска, Стипе Месиќ, милијардерите, Бранко Роглиќ (Орбико), Миодраг Мишковиќ (Делта холдинг) и Рифат Хисарчиоглу од Турција, претседателот Стево Пендаровски, премиерот Зоран Заев, гувернерката Анита Ангеловска-Бежовска и повеќе стотици други бизнисмени, министри, соработници и пријатели на Стопанската комора на Македонија“, стои во соопштението на Комората.

Од таму дополнуваат дека тие ќе бидат дел од специјалната емисија насловена “99 години Стопанска комора на Македонија“, која ќе се емитува на нашите телевизиски куќи, поради една и единствена причина – мерките што се во сила за заштита од актуелната пандемија предизвикана од вирусот корона.

“Од истите причини, за првпат во својата историја, Стопанската комора на Македонија и традиционалните награди ги додели во компаниите, а не во своето седиште“, велат од Стопанската комора.

Според нив, Стопанската комора на Македонија претставува моќна организација, со признато реноме и дома и во регионот.

“Членките на Комората создаваат половина од вкупниот приход во приватниот сектор, односно 50,3%, речиси половина од профитот во приватниот сектор, односно 47,6% и секој трет вработен во приватниот сектор е вработен во компанија членка на нашата комора, односно 33,7%. Во апаратот на Стопанската комора на Македонија има тројца доктори на наука, 15 магистри и повеќе од 10-тина експерти. Но тие бројки се многу поголеми во членките, каде што има повеќе од илјада инженери, правници, економисти, меѓународно признати експерти, академици и луѓе со високи научни титули. Таква концентрација на умствен капитал нема ниту една друга институција. Сето тоа се остварува во услови на коморски плурализам и на доброволно членство. Коморскиот плурализам и доброволното членство се вистински доказ за нашата успешност, која на најпрофесионален начин е во функција на приватниот сектор во нашата држава“, велат оттаму.

Регионално, Комората во последните години двапати претседаваше со Асоцијацијата на балканските комори (асоцијација на 11 држави на Југоисточна Европа), а денес е успешен предводник на Коморскиот инвестициски форум (КИФ) со седиште во Трст, кој настана во 2016 година во рамките на Берлинскиот процес на германскиот канцелар Ангела Меркел.

“Можам да потврдам дека Комората е подготвена за новите предизвици, како што се дигитализацијата, зелената енергија, енергетската ефикасност, борбата против пандемиите и другите општествени зла и подготвени сме да се фатиме во костец со најгорливите проблеми на економијата“, изјави Бранко Азески, претседател на Стопанската комора.

Фото: Стопанска комора