Извршниот директор на најголемата европска банка ХСБЦ, Ноел Квин, неочекувано ќе се пензионира по речиси пет години на најодговорната функција.
Управниот одбор на банката започна формален процес за пронаоѓање на неговиот наследник, земајќи ги предвид и внатрешните и надворешните кандидати, се вели во официјалното соопштение објавено од Блумберг. Квин ќе остане на својата функција за време на овој процес за да обезбеди непречена транзиција, се вели во соопштението.
За време на неговиот мандат, Квин направи серија стратешки потези, кулминирајќи со планот за зголемување на инвестициите на банката во нејзиниот бизнис во Азија, а истовремено намалување на развиените западни пазари како што се САД и Франција.
„По интензивни пет години, сега е вистинското време да направам подобар баланс помеѓу мојот личен и професионалниот живот“, рече Квин во објавеното соопштение.
Неговото заминување, сепак, доаѓа во незгодно време, кога ХСБЦ и другите големи кредитори кои се изложени на Кина се соочуваат со влошена геополитичка ситуација што ги поткопува повеќедецениските напори на многу големи компании.
Банката со седиште во Лондон во вторникот, исто така, објави пад од 1,8 отсто на кварталната добивка пред оданочување на 12,65 милијарди долари, надминувајќи ја претходната консензуална проценка од 12,6 милијарди долари.
Квин беше назначен за извршен директор во март 2020 година, откако ја водеше банката неколку месеци откако го замени својот претходник, Џон Флинт, кој се повлече во август 2019 година.
