Гувернерката на Банката на Русија, Елвира Набиулина, потврди дека руската централна банка би можела да премине кон намалување на основната каматна стапка во втората половина од тековната година. Промената на политиката ќе следи под услов во меѓувреме инфлацијата да се намали.
Набиулина предупреди на ризиците од предвремено олабавување на монетарната политика, нагласувајќи дека влијанието на строгата монетарна политика врз економскиот раст е минимално, пренесува Комерсант. „Цврстата монетарна политика ја забавува инфлацијата, но економијата продолжува да покажува импресивни стапки на раст“, изјави гувернерот, пренесува Комерсант.
Според шефот на руската централна банка, пазарот на трудот и недостигот на кадри имаат многу поголемо влијание врз стапката на раст. Набиулина додаде дека главниот ограничувачки фактор за проширување на производството е недостатокот на работна сила, а невработеноста во Русија е на историски ниско ниво.
Проширувањето на производството сега е можно главно преку инвестиции во автоматизација и зголемена продуктивност. „Затоа, ниската и предвидлива инфлација не е помалку важна за бизнисот отколку за граѓаните“, рече Набиулина.
Таа изјави дека искуствата на многу земји покажуваат дека предвременото намалување на каматната стапка може да предизвика втор бран на инфлација, со кој потешко се справува од првиот. „Ако инфлацијата продолжи да се забавува, претпоставуваме дека ќе можеме да започнеме со намалување на основната стапка оваа година, веројатно во втората половина“, рече гувернерката во своето обраќање во Државната дума.