Европската централна банка (ЕЦБ) би морала да го проверува ризикот во самите банки при утврдувањето на барањата за потребното ниво на капитал, сметаат независни експерти, предупредувајќи дека оценките на самите банки често се пристрасни.
Тоа е најзначајната препорака на експертите кои требаше да го оценат извршувањето на клучната надзорна задача од страна на ЕЦБ, со фокус на одлучување за потребниот износ на капитал што банките мора да го поседуваат за да ги „покријат“ потенцијалните загуби.
Анализата беше нарачана од самата ЕЦБ, а започна во септември минатата година, многу пред проблемите во американската SVB и во швајцарскиот Credit Suisse, кои покренаа бројни прашања во врска со банкарската регулатива, пренесува SEEbiz.
При утврдување на барањата за капитал, ЕЦБ ја комбинира својата анализа со интерните проценки на банките за ризикот и соодветните нивоа на капитал.
Пет експерти, поранешни супервизори од Јапонија, САД, Ирска, Шпанија и Канада, сметаат дека таквиот пристап е „концептуално слаб“. Тие исто така тврдат дека внатрешниот процес на проценка на адекватноста на капиталот (ICAAP) во самите банки често е пристрасен.
Затоа, ЕЦБ не треба да се потпира на нив, заклучуваат тие.
„ICAAP треба да се користат како помошни информации, а не како основа за анализа“, сметаат независни експерти.
Тие и предлагаат на ЕЦБ да го промени начинот на одредување на капиталните барања и да се фокусира „на специфичните ризици кои бараат дополнително покривање на капиталот, а во исто време значително да ја ограничи употребата на ICAAP“.
Главниот банкарски супервизор на ЕЦБ, Андреа Енриа, рече дека препораките на експертите го зајакнале неговото „убедување дека надзорот мора да биде поадаптивен, инвазивен и фокусиран на ризик“.
Фото: Pixabay
