Ние сме извор на инспирација за бизнис лидерите да управуваат на подобар начин и да го направат светот подобро место за сите, вели Аслак де Силва, главен извршен директор на Nordic Business Forum во интервју за нашиот портал.
Бизнис Инфо: Од први март 2018 година сте на чело на Nordic Business Forum. Кои се најголеми предизвици и успеси додека сте дел од оваа организација?
За 10 години, Nordic Business Forum стана една од најзначајните деловни конференции во светот. Тимот направи одлична работа и моја цел е да ја однесам компанијата на следно ниво – да биде препознаена и позната насекаде во светот. Целта е прилично амбициозна и затоа е голем предизвик.
Бизнис Инфо: Во октомври организирате голема конференција под името Growth (Раст). Која е целта на оваа конференција и кои ќе бидат гости говорници?
Нашите конференции се организирани за сопственици на бизниси и лидери на стратешки позиции во компаниите. Ние ги носиме најдобрите експерти на одредена тема за да им помогнеме да ги зголемат своите лидерски вештини и да го развијат бизнисот на повисоко ниво. Говорниците се експерти кои ќе зборуваат на темата раст и од професионален и од личен план. Говорници на Брене Браун и Даниел Пинк се врвни експерти за личен развој, додека говорници како Сара Блејкли, Стив Возниак и Џорџ Клуни ќе зборуваат за тоа како да се развие една компанија и како да се вреднува. Овие теми се особено важни за сите кои ќе бидат присутни и ќе бидат инспиративни за развој на различни начини. Ако погледнеме наназад, досега имавме голем број на одлични и влијателни говорници, како што е претседателот Обама, потоа Ејми Кади и Сузан Чеин. Исто така, уживавме и во говорите на Аријана Хафингтон, Џек Велч, Рејчел Бустман и Арнолд Шварценегер. Овие говорници се само дел од оние кои биле дел од форумот низ годините наназад.
Бизнис Инфо: Досега сте имале одлични гости говорници, меѓу нив и познати личности. По кои критериуми ги избирате?
Нашиот пристап е сеопфатен кога станува збор за избор на гости говорници на главните теми, па така вклучуваме истражувачи и професори, успешни бизнис лидери, експерти кои можат да дадат одличен резултат. Бидејќи нашата публика е добро едуцирана и има високи очекувања за инспирација и знаење, мора да направиме најдобар избор и да ги најдеме најдобрите говорници. Луѓето сакаат да учат од најдобрите и наша задача е да ги донесеме најдобрите говорници. Вообичаено, меѓу говорниците вклучуваме звучни имиња, кои може да се наречат популарни, како и нови и непознати ѕвезди кои можат да ја изненадат публиката со она што ќе го презентираат. Затоа, процесот на селекција е тежок, но многу важен за нас.
Бизнис Инфо: По што нордиските земји се разликуваат од остатокот од Европа и во што лежи тајната на бизнис успехот?
Јас би рекол дка ниската хиерархија и еднаквоста на работното место се главно обележје на нордиските земји. Секој има право на глас и истиот ќе биде слушнат. Покрај тоа, секој има можност да напредува во кариерата заснована на вештини и мотивација, без оглед на претходното искуство. Компаниите во нордиските земји тежнеат кон тоа да имаат помалку работна сила и помалку формална работна култура. Исто така, би сакал да го истакнам образовниот систем и тоа што секој има шанса да студира на повисоко ниво. Квалификуваниот персонал, особено во високо – технолошкиот сектор, е особено важен за успехот на компаниите од овој дел на светот.
Бизнис Инфо: Што планирате да постигнете со настаните на Nordic Business Forum?
Наша мисија е да создадеме лидери кои ќе го променат светот. Ние веруваме дека инспирацијата на бизнис лидерите кои сакаат да го направат светот подобро место за живеење е единствен и ефективен начин на којшто може да оставиме белег на општеството во целина. Ние сме извор на инспирација за бизнис лидерите да управуваат на подобар начин и да го направат светот подобро место за сите.
Бизнис Инфо: Како се развива вашиот план досега? Дали сте задоволни?
На годишно ниво, имаме публика од околу 10.000 лица и над 20.000 кои нè следат онлајн. Ние сме особено среќни што може да допреме до толку многу лидери, но се надевам дека ќе станеме инспирација и за илјадници нови, па дури и милиони лидери ширум светот. На секој лидер во светот треба да му биде достапна инспирација и знаење. Имаме уште многу што може да направиме, но засега сме среќни со успехот што го постигнуваме.
Бизнис Инфо: Дали планирате да посетите други земји и да ја споделите вашата идеја и искуство?
Што се однесува до организирање бизнис конференции, нашиот план е да се прошириме на нови пазари во блиска иднина. Каде и кога ќе се случи тоа, сè уште е отворено прашање. Покрај нашите настани, исто така, организираме и сопствен напревар на говорници, каде бараме нови лидери и бизнис говорници, кои можеби сè уште ја немаат публиката што ја заслужуваат. Во овој момент, натпреварот се организира само во нордиските земји, но ги разгледуваме можностите за организирање и во Европа и Северна Америка. Можностите се бесконечни и добиваме и барања за организирање настани и на други континенти. Лично, јас имам говори на повеќе локации во повеќе земји во светот на годишо ниво. Само што се вратив од САД, наскоро треба да ја посетам Турција и други земји. Многу ми се важни сите видови на настани на коишто можам да присуствувам, а во исто време да го споделам своето знаење и искуство.
