Министерството за правда на САД издаде покани до Nvidia и други компании бидејќи бара докази дека производителот на чипови ги прекршил антимонополските закони, што е ескалација на претходната истрага за доминантниот снабдувач на процесори за вештачка интелигенција (AI).
Министерството сега испраќа правно обврзувачки барања кои ги обврзуваат примателите да ги дадат бараните информации, велат познавачите на истрагата. Тоа ја носи владата чекор поблиску до поднесување формална жалба.
Антимонополските власти се загрижени дека Nvidia им отежнува на компаниите потенцијално да се префрлат на други добавувачи и ги казнува клиентите кои не ги користат исклучиво нејзините чипови со вештачка интелигенција, велат упатените за Bloomberg.
Акциите на Nvidia, кои претрпеа рекорден пад од 279 милијарди долари (вкупна капитализација) во вторникот, дополнително паднаа во доцното тргување вчера, откако Bloomberg објави за новите покани.
Како дел од истрагата, иследниците контактирале и со други технолошки компании за да ги соберат сите информации. Владините претставници одбија да ја коментираат истрагата што е во тек.
Од друга страна, како одговор на прашањата за истрагата, Nvidia рече дека нејзината доминација на пазарот произлегува од квалитетот на нејзините производи, кои обезбедуваат побрзи перформанси.
„Nvidia заслужено победува, благодарение на нашите стандарди и вредности за клиентите, кои можат да изберат кое решение е најдобро за нив“, се вели во соопштението на компанијата.
Nvidia е под построга регулаторна контрола откако стана највредниот производител на чипови во светот и клучен корисник на бумот на трошење на вештачката интелигенција. Продажбата се зголемува повеќе од двојно секој квартал и ги победи поранешните лидери на чипови како што е Интел, сега во голема неволја.
Конкретно, регулаторите внимателно го испитуваат купувањето на RunAI од Nvidia, објавено во април. Компанијата произведува софтвер за управување со компјутери со вештачка интелигенција и постои загриженост дека поврзаноста ќе им отежне на корисниците да се префрлат од чиповите Nvidia доколку сакаат. Регулаторите исто така се прашуваат дали Nvidia им дава повластени зделки и цени на клиентите кои ја користат само нејзината технологија или ги купуваат нејзините комплетни системи.
Nvidia, основана во 1993 година, се прослави со продажба на графички картички наменети првенствено за гејмерите и учесниците во креативната индустрија. Но, нејзиниот пристап за правење чипови на крајот се покажа корисен за градење модели со вештачка интелигенција, процес кој вклучува „бомбардирање“ на софтвер со податоци. Компанијата, исто така, брзо ги прошири своите понуди со голем број софтвер, сервери, мрежи и услуги – сите насочени, тврдат од Nvidia, да го забрзаат распоредувањето на вештачката интелигенција.
