Авиокомпанијата Austrian Airlines и операторот на македонските аеродроми ТАВ денеска на аеродромот Александар Велики ја одбележаа 20-годишнината од првиот лет Скопје – Виена, пишува Миа.
“Отсекогаш сме имале многу посебна врска со Македонија, поврзувајќи го вашиот главен град со нашиот во Австрија, со што обезбедуваме сигурна конекција меѓу двете земји и превезуваме голем број патници меѓу двата града, без оглед дали патуваат за бизнис или за одмор и за рекреација“, истакна регионалниот директор на Austrian Airlines, Александер Толвет. Тој додаде дека лани на оваа линија превезле повеќе од 97.000 патници.
Генералниот директор на ТАВ Македонија, Зоран Крстевски порача дека квалитетот на услугите што ги нуди компанијата Austrian Airlines бил пресуден за континуирано 20 години да се одржи летот Виена – Скопје и да има голем интерес за него.
“ТАВ во оваа компанија гледа сигурен партнер, кој точно, навремено и безбедно ги превезува патниците од Скопје кон европските дестинации. Истовремено, преку виенскиот аеродром им овозможува директна врска и со другите континенти. Искрено се надевам дека ова партнерство ќе трае уште долги години и заедно ќе прославиме уште поголеми јубилеи“, изјави Крстевски.
