На иницијатива на Дирекцијата за технолошко индустриски развојни зони (ДТИРЗ), Владата донесе одлука да се формира нова државна индустриска зона во Битола. Во оваа фаза, индустриската зона зафаќа површина од три хектари, на дел од локацијата каде претходно се протегаше општинската индустриска зона Жабени.
Првично, Дирекцијата за ТИРЗ ќе вложи еден милион евра за подобрување на условите за работа, со план овој износ да се зголеми на три до четири милиони евра до крајот на 2021 година, согласно и потребите на инвеститорите.
Во соработка со Кабинетот на Заменикот на претседателот на Владата задолжен за економски систем, координација на економски ресори и инвестиции Фатмир Битиќи, во напредна фаза се преговори и со првиот потенцијален странски инвеститор за новата зона. Интерес за инвестиции, со ваков пристап на поддршка од државата изразија и други компании.
Основањето на новата зона дел од новиот пристап на ДТИРЗ и модел преку кој треба да се обезбеди поддршка од Дирекцијата и државата за побрзо креирање подобри услови за инвестиции во општините. Истовремено на овој начин се создаваат исти услови за инвестирање и за странските и за домашните инвеститори.
Инаку покрај новата индустриска зона Битола, во 2021 година ДТИРЗ веќе започна инвестициски циклус од 15 милиони евра во инфраструктура во повеќе други индустриски зони. Овој план за првпат е изготвен во соработка со компаниите корисници и според нивните потреби.
