Цените на акциите нагло паднаа на азиските берзи во понеделникот, додека доларот зајакна бидејќи инвеститорите не се склони кон поризични инвестиции поради протестите во Кина против острите рестриктивни мерки за борба против Ковид-19.
Индексот MSCI на азиско-пацифичките акции, без јапонските акции, беше во минус за речиси 2 отсто околу 7:00 часот.
Истовремено, индексот Никеи падна за 0,6 отсто на токиската берза, додека цените на акциите во Австралија, Јужна Кореја, Шангај и Хонг Конг паднаа меѓу 0,4 и 2,4 отсто.
Берзите се под притисок поради протестите против строгите рестриктивни мерки за спречување на ширењето на Ковид, што избувна во неделата наутро во неколку кинески градови, вклучувајќи го и финансискиот центар Шангај, како и делови од главниот град Пекинг.
Нов бран на незадоволство предизвика пожарот што во четвртокот избувна во зграда во главниот град Урумчи во регионот Ксинџијанг, при што загинаа десет лица. Гневот на јавноста беше предизвикан од сомнежите дека станарите на зградата не можеле да побегнат навреме бидејќи зградата е делумно затворена.
„Пазарот не сака неизвесност и јасно е дека протестите во Кина ги загрижија инвеститорите и затоа тие не се склони кон поризични инвестиции. Некои се плашат и од нови протести, со оглед на острите рестриктивни мерки, кои би можеле да доведат до слабеење на економијата“, вели Роберт Суббараман, главен економист во Номура.
Вестите за натамошното зголемување на бројот на заразени со вирусот ковид-19 во Кина, исто така, имаат негативен ефект врз пазарите, што може да доведе до нови рестриктивни мерки, кои би го забавиле и онака многу бавниот раст на втората по големина во светот економијата.
Затоа инвеститорите не беа охрабрени од одлуката на кинеската централна банка да ја намали стапката на распределба на задолжителните резерви на банките за 0,25 процентни поени, што треба да го поттикне кредитирањето, а со тоа и растот на економијата.
Доларот зајакна
А на валутните пазари вредноста на доларот во однос на кошницата валути е зголемена бидејќи доларот е познат како безбедно засолниште за капитал во неизвесни времиња.
Индексот на доларот кој ја покажува вредноста на американскиот долар во однос на другите шест најважни светски валути се движи околу 106,35 поени, додека во петокот вечерта изнесуваше 106,05 поени.
Истовремено, курсот на доларот во однос на јапонската валута се лизна за 0,5 отсто, на 138,45 јени.
Сепак, американската валута зајакна во однос на европската, па цената на еврото се лизна за 0,4 отсто, на 1,0355 долари.
