Пад на приходите на фудбалскиот пазар – загубите се бележат во милијарди

50

Според извештај за финансиите во фудбалот на ревизорската компанија Deloitte, европскиот фудбалски пазар забележа пад на приходите во износ од 3,7 милијарди евра, односно намалување за 13% поради пандемијата. Неговата вредност изнесуваше 25,2 милијарди евра во сезоната 2019/20, објави ревизорската компанија. Како што е наведено во извештајот, ова е прв пад на приходите од глобалната финансиска криза во сезоната 2008/09.Во годишниот извештај за финансиите во фудбалот, Deloitte открива дека приходите во најсилните пет лиги (Англија, Германија, Италија, Шпанија и Франција) изнесуваат 15,1 милијарди евра, односно 11% помалку од претходната година.

Приходите на екипите од англиската премиер лига се намалени за 13%, од рекордните 5,8 милијарди евра во сезоната 2018/19 на 5,1 милијарди во сезоната 2019/20.

Deloitte исто така објаснува дека ова е прв пад на вкупните приходи во историјата на Премиер лигата и најнизок приход остварен од сезоната 2015/16.

Со приходи од 3,2 милијарди евра, германската Бундеслига има најмал пад на приходите од само 4%, додека шпанската Ла Лига со приходи од 3,1 милијарди евра е веднаш зад нив.

Италијанската Серија А оствари приходи од 2,1 милијарди евра што е пад за 18% додека француската Лига 1 која ја откажа сезоната поради мерките во борбата против пандемијата на коронавирусот оствари приходи од 1,6 милијарди евра, односно има пад на приходите од 16%.

“Потребно е да се напомене дека иако сега веќе се поминати 16 месеци од почетокот на пандемијата во Европа, анализата во овој извештај е направена за финансиската година 2019/20. Привремениот прекин на лигите донесе разлика во поглед на завршувањето на сезоната и стандардните периоди на финансиски извештаи во Англија, Шпанија и Италија“, изјави Ден Џонс, од секторот за анализа на спортски настани во Deloitte.

Фото: Pixabay