Германија официјално влезе во рецесија минатата недела, а во изјавите на европските претставници се вели дека некои европски земји сепак ќе се соочат со висока инфлација и предизвици чии крајни последици сè уште не можат точно да се предвидат.
По лошите вести за Германија, министерот за финансии на Обединетото Кралство Џереми Хант рече дека нема проблем со тоа што Британија би паднала во рецесија доколку тоа е она што е потребно за да се победи инфлацијата. Тој го објави ова неколку дена откако Меѓународниот монетарен фонд соопшти дека Британија „ќе избегне куршум“.
Министерот рече дека ќе ја поддржи Банката на Англија во натамошното зголемување на каматните стапки бидејќи смета дека тоа е „единствениот начин за одржлив раст“.
Банката ги зголемува каматните стапки како начин за справување со инфлацијата, но пазарите предвидуваат дека каматните стапки би можеле да се зголемат на 5,5 отсто оваа година од сегашните 4,5 отсто.
Иако е намалена од 10,1 отсто, инфлацијата останува тврдоглаво висока на 8,7 отсто, со базичната инфлација (која ги исклучува цените на храната и енергијата) на највисоко ниво од 1992 година, додека храната и понатаму е алармантно скапа.
Хант изјави за Скај њуз дека е неопходно да се дадат приоритет на мерките за забавување на растот на цените дури и ако зголемувањето на каматните стапки му наштети на британскиот бруто домашен производ (БДП), мерка за големината на економијата.
Запрашан дали ги поддржува активностите на Банката дури и ако тоа може да предизвика рецесија, Хант рече: „Да, затоа што на крајот инфлацијата е извор на нестабилност. Ако сакаме да имаме просперитет, да ја зголемиме економијата, да го намалиме ризикот од рецесија, ние мора да ја поддржиме Банката на Англија во тешките одлуки што ги носи“.
„Морам да направам нешто друго, а тоа е да се осигурам дека одлуките што ги носам како министер се многу тешки одлуки за да се балансира сето она што треба да се направи. Сите овие работи значат дека монетарната политика на Банката на Англија (и) на министерот фискалната политика е усогласена“, додаде тој.
Британскиот премиер Риши Сунак, наводно, ја поставил инфлацијата како свој „главен“ приоритет пред општите избори што треба да се одржат во следните две години. Во јануари – кога инфлацијата беше 10,1 отсто – премиерот вети дека ќе ја намали на половина оваа година.
Гувернерот на банката Ендрју Бејли верува дека сè уште има шанса Владата да го исполни своето ветување и покрај тоа што цените продолжуваат да растат.
Меѓународниот монетарен фонд, исто така, ја подобри прогнозата за раст на економијата на Велика Британија, предвидувајќи избегнување на рецесија и благ раст од 0,4 отсто.
„Тоа не е компромис помеѓу борбата против инфлацијата и борбата против рецесијата. На крајот, единствениот пат до одржлив раст е да се намали инфлацијата“, рече Хант.
