Според онлајн трговецот и брокер AutoScout24, користени автомобили во ноември се продавале во просек за 24.772 евра. Тоа е за речиси 12 отсто повеќе од пред една година и највисоко од изготвувањето на статистиката. Побарувачката за половни автомобили е многу поголема од понудата.
Автомобилскиот сектор се соочува со криза по криза. Пред две години, фабриките беа затворени поради корона вирусот. Потоа следеше недостиг на чипови ширум светот, кој продолжува да го мачи автомобилскиот сектор, проследен со недостиг на кабли за возила, кои се произведуваат во Украина. Во меѓувреме, побарувачката се зголеми. Некои нови автомобили сега имаат рок на испорака од една година, што ги прави користените автомобили попривлечни.
Како што објави AutoScout24, ситуацијата на пазарот полека се подобрува, иако цените сè уште растат. Доколку продолжи нагорниот тренд, просечната цена на половните автомобили на крајот на годината ќе надмине 25.000 евра на европскиот пазар. Првите информации од Австрија и Германија велат дека оваа граница е веќе пробиена.
