Александар Бјелиќ од компанијата Глобо и графичкиот дизајнер Дарко Марчета најавија дека за две години на специјализираната изложба Експо 2027 во Белград ќе претстават прототип на обновениот автомобилски бренд „Југо“, кој ќе биде во возна состојба.
Бјелиќ истакна дека како колекционер на автомобили и нов сопственик на правата на името и моделот, сака да го заштити името „Југо“ и да го врати на патиштата.
„Роден сум во Германија и никогаш не сум живеел во поранешна Југославија или Србија. Во последните 10 години, сè повеќе ме привлекува Србија, бидејќи имам српско потекло и како колекционер на класични и спортски автомобили, и секако возила на Застава, решив да иницирам заштита на брендот со дефинитивна цел да го вратам „Yugo“, не само како бренд туку и како возило, рече Бјелиќ, гостувајќи во РТС.
Како што рече, процесот за преземање на брендот „Југо“ бил комплициран и долг, но благодарение на квалитетниот адвокатски тим успеал да стане сопственик на тој бренд.
Тој додаде дека никогаш не се занимавал со производство на автомобили, иако во автомобилската индустрија бил повеќе од 30 години.
„Производството никогаш не било цел, сега бараме некој од производителите да му се допадне дизајнот. Тоа е нешто ново, да се врати тој бренд на различни пазари, но ќе знаеме повеќе за тоа во 2027 година“, рече Бјелиќ.
Дарко Марчета, кој е задолжен за дизајнот, изјави дека досега е изработен модел од глина во размер 1:5, кој ќе се користи и во тунел за ветер за да се провери дали аеродинамиката е соодветна пред да започне изградбата на прототип во целосна големина.
Според него, бројни детали влијаат на цената, но важно е новото „југо“ да не е скапо и автомобилот да е достапен како што беше оригиналниот „југо“.
Според досега објавените информации, автомобилот ќе ги исполнува сите прописи за издувни гасови и безбедност.
Новото „југо“ е планирано да се движи исклучиво со бензински мотор, но не е исклучена можноста да се движи и на струја.