Австралија ќе го зголеми својот воен буџет за 50,3 милијарди австралиски долари (32 милијарди американски долари) во следната деценија.
Во тој период ги модернизираше и своите програми за вооружување со цел да стави акцент на ракетите, беспилотните летала и воените бродови.
Најголемиот дел од новите распределби, кои ќе изнесуваат вкупно 330 милијарди австралиски долари во следните 10 години, ќе бидат реализирани во последните пет години, зголемувајќи го буџетот за одбрана на 2,4 отсто од БДП до 2034 година од износи од нешто над 2 отсто во моментот пренесе Ројтерс.
Министерот за одбрана Ричард Марлс изјави дека овој буџет ги одразува новите приоритети, како што се ракетите со долг дострел, за кои Австралија верува дека се неопходни во свет каде што потенцијалниот конфликт меѓу Кина и САД може да има значително влијание врз регионот.
„Оптимистичките претпоставки кои не водеа во планирањето на одбраната по крајот на Студената војна одамна ги нема. Нашата средина се карактеризира со несигурност и тензии кои се вкоренети во растечкото стратешко ривалство меѓу САД и Кина“, рече Марлс.
Како што е соопштено, нешто повеќе од 40 отсто од распределбата, или околу 145 милијарди австралиски долари, се наменети за морнарицата, вклучително и засилување за површинската флота, но и за програмата за подморници на нуклеарен погон и за развој на поморски дронови. Една петта, или до 74 милијарди австралиски долари, ќе одат за програми поврзани со проектили, чија важност беше истакната во прегледот на трошоците минатата година, според Ројтерс.
Според овој документ, предвидена е набавка на нови ракети со поголем дострел за воздухопловните сили и армијата, програми за противракетна одбрана и домашно производство на наведувано оружје.
