На Волстрит пораснаа берзанските индекси, по два дена пад и откако претседателот на американската централна банка Џером Пауел изјави дека нема да брза со намалување на каматните стапки.
Dow Jones зајакна 0,20 отсто, на 38.661 поен, додека S&P 500 порасна за 0,51 отсто, на 5.104 поени, а индексот Nasdaq 0,58 отсто, на 16.031 поен.
Инвеститорите беа фокусирани на извештајот на претседателот на ФЕД до Конгресот, во кој тој рече дека инфлацијата значително се намали откако достигна 40-годишен максимум во 2022 година, но дека претставниците на ФЕД сакаат да бидат сигурни дека инфлацијата ќе продолжи да слабее пред да одлучат да ги намалат каматните стапки.
Американската економија постојано расте
Пауел посочи дека битката со инфлацијата може да се изгуби поради пребрзото намалување на каматите, во тој случај каматите треба повторно да се зголемат, додека предолгото чекање за намалување на каматните стапки би го загрозило растот на економијата.
И покрај агресивното зголемување на каматните стапки на ФЕД во последните две години, американската економија продолжува да расте, а инфлацијата постепено се намалува.
Коментарите на Пауел не влијаеја значително на проценките во однос на каматните стапки, па повеќето аналитичари сметаат дека ФЕД може да започне со намалување на каматните стапки во јуни.
Раст и на европските берзи
Во девет од 11-те најважни сектори на индексот S&P 500, цените на акциите вчера пораснаа, а највисоко во услужниот и технолошкиот сектор, за околу 1 процент.
Во претходните два дена берзанските индекси паднаа за повеќе од 1 процент.
Цените на акциите вчера пораснаа и на европските берзи. Лондонски FTSE индекс зајакна за 0,43 отсто, на 7.679 поени, додека франкфуртски DAX зајакна 0,10 отсто, на 17.716 поени, а париски CAC зајакна за 0,28 отсто, на 7.954 поени.
