Рестораните и баровите во Бугарија ќе треба да се затворат во 22 часот на 7 септември, додека спортските натпревари во салите ќе се одржуваат без гледачи, изјави денеска бугарскиот министер за здравство, Стојчо Кацаров.
“Нема простор за паника. Ситуацијата е сериозна, но не излегува од контрола. Нискиот процент на вакцинација не тера да ги воведеме овие мерки – рече министерот пред новинарите“, пренесе Ројтерс.
Тој уште еднаш апелираше до граѓаните да се вакцинираат.
Според новите ограничувања, кои ќе стапат на сила до крајот на октомври, музичките фестивали ќе бидат забранети, додека кината и театрите ќе треба да работат со капацитет од 50 проценти.
На учениците ќе им биде дозволено да посетуваат настава кога ќе започне учебната година на 15 септември, рече Кацаров, но предупреди дека ако бројот на новозаразените продолжи да расте, можеби ќе треба да се префрлат на онлајн часови.
Бугарија, земјата со најниска стапка на вакцинација против коронавирус во Европската унија, во последните недели забележа голем скок на инфекции предизвикани од многу заразниот делта вид.
Во Бугарија, со седум милиони жители, денеска се регистрирани 1.745 нови случаи на коронавирус, со што вкупниот број на активни инфекции достигна 32.192.
Околу 18.950 луѓе починаа од почетокот на пандемијата, а уште 54 лица починаа денеска во Бугарија, која има највисока стапка на смртност во Европската унија, според податоците на веб -страницата „Our World in Data“.
