Најголемиот руски производител на нафта, Роснефт, во средата објави дека потпишал договор со најголемата индиска рафинерија Indian Oil Corp, кој предвидува значително повисоки испораки на неколку видови нафта.
Извршниот директор на Роснефт, Игор Сечин, го потпиша договорот за време на работната посета на Индија, соопшти компанијата, без да открие детали.
„Двете страни разговараа и за можностите за проширување на соработката меѓу нафтената компанија Роснефт и индиските компании во целиот синџир на вредност на енергетскиот сектор, вклучително и можноста за плаќање во локални валути“, се додава.
Русија го пренасочува снабдувањето со енергија од традиционалните европски пазари поради серијата санкции што и ги воведе Западот откако руските трупи влегоа во Украина на крајот на февруари минатата година, забележува Ројтерс.
Во март, Индија беше најголемиот купувач на руската нафта од Урал, со повеќе од половина од вкупниот извоз испорачан со танкери. Кина е на второ место.
Рускиот вицепремиер Александар Новак изјави во вторникот дека Русија минатата година и продаде на Индија 22 пати повеќе нафта отколку во 2021 година, без да даде бројки.
„Роснефт“ објави дека Русија за првпат се рангираше меѓу првите пет трговски партнери на Индија, со билатерален обем на трговија од 38,4 милијарди долари во 2022 година.
Фото: Facebook
