Соединетите Американски Држави значително ги намалија предложените нови царински стапки за увоз на тестенини од неколку италијански производители, по прелиминарна анализа на нивните антидампинг активности, објави италијанското Министерство за надворешни работи.
Новата анализа покажа дека италијанските производители решиле многу од проблемите идентификувани во првичната проценка, изјави функционер на Министерството за трговија на САД.
Во октомври, САД објавија дека ќе воведат дополнителен данок од 92 проценти за увоз на тестенини од 13 италијански производители, покрај стандардната царинска стапка од 15 проценти за повеќето стоки увезени од Европската Унија, обвинувајќи две од тие компании – Ла Молисана и Гарофало – дека продаваат тестенини по неправедно ниски цени.
По новата проценка, Министерството за трговија на САД ја намали предложената дополнителна царинска стапка на 2,26 проценти за тестенините произведени од „Ла Молисана“ и на 13,98 проценти за тестенините произведени од „Гарофало“, објави италијанското Министерство за надворешни работи. За тестенините на преостанатите 11 производители кои не беа индивидуално анализирани во новата проценка, беа утврдени даноци од 9,09 проценти.
„Повторната пресметка на царинските давачки е знак дека американската влада признава дека нашите компании се подготвени конструктивно да соработуваат“, се вели во соопштението на италијанското министерство.
Вашингтон е посветен на спроведување на „фер, транспарентен процес“, изјави претставник на Министерството за трговија на САД.
„(Нашата) анализа по прелиминарната проценка покажува дека италијанските производители на тестенини решиле многу од проблемите што Министерството за трговија ги наведе во прелиминарната одлука“, рече претставникот, додавајќи дека Министерството за трговија ќе продолжи да комуницира со заинтересираните страни и да ги земе предвид сите информации пред да донесе конечна одлука.
Според распоредот, конечната одлука треба да биде објавена на 12 март, но рокот може да се продолжи до 60 дена. Новите царини ќе се применат дури по анализата на сите резултати.
Со други зборови, досега САД не ги зголемиле царините за увоз на италијански тестенини.
Тринаесет компании кои се предмет на анализата имаат удел од околу 16 проценти во вкупниот увоз на тестенини од Италија во САД.
Вкупната вредност на извозот на италијански тестенини во 2024 година надмина четири милијарди евра, според податоците од италијанскиот завод за статистика ISTAT. Вредноста на американскиот пазар за италијанските компании е речиси 800 милиони долари.
Намалувањето на предложените нови царини беше поздравено од Маргерита Мастромауро, претседателка на одделот за производители на тестенини на здружението „Унионе Италијана Фуд“.
„Одлуката на американската влада потврдува дека САД обрнуваат внимание на Италија и на судбината на нашата економија“, рече Мастромауро.