Производителот на луксузни електрични возила Lucid Group неодамна ја отвори својата прва меѓународна фабрика во Џеда, Саудиска Арабија. Ова се случи во време кога Саудиска Арабија работи да биде светски број еден во производството на електрични возила.
Горенаведената фабрика ќе биде делумно во сопственост на Саудискиот јавен инвестициски фонд и се очекува да произведува 150.000 возила годишно.
Фајсал Султан, потпретседател на Lucid Group и генерален директор на оваа компанија за Блискиот Исток, рече дека отворањето на новата фабрика ќе создаде можност за спроведување на неодамна потпишаниот договор со Владата на Саудиска Арабија за продажба на 100.000 возила во десет години.
Саудискиот министер за индустрија и ресурси Бандар Алхорајф оцени дека новата фабрика е доказ за способноста на неговата земја да привлекува инвестиции и да се натпреварува. Тој истакна дека националната индустриска стратегија на Саудиска Арабија подразбира воспоставување на флексибилна, конкурентна и одржлива индустриска економија.
Индустријата за електрични возила е еден од 12-те стратешки индустриски ненафтени сектори во земјата. Саудискиот принц Мохамед бин Салман минатата година го лансираше брендот на електрични возила Ceer во обид да ја диверзифицира земјата економски. Тоа го направи со саудискиот државен фонд и во соработка со тајванската компанија Foxconn. Планот е да се произведуваат 170.000 автомобили годишно. Саудиска цел е да има производство на електрични автомобили како што имаат Јужна Кореја и Кина.
Според проценката на агенцијата за истражување на пазарот Mordor Intelligence, пазарот на електрични возила на Блискиот Исток и Африка вредел 40,25 милиони долари во 2021 година и се очекува да вреди 93,10 милиони долари до 2027 година. Во 2021 година, саудиските власти истакнаа дека сакаат 30 отсто од возилата во Ријад да бидат електрични до 2030 година. Голдман Сакс проценува дека електричните возила ќе сочинуваат половина од продажбата на нови автомобили ширум светот до 2035 година, пренесува Кликс.ба.
„Саудиска Арабија е на пат да стане глобален лидер во електричните возила, усогласувајќи се со нејзините амбициозни цели за намалување на јаглеродот и обновлива енергија“, рече Мајкл Першке, извршен директор на германската компанија за електрични возила Quantron AG.
Станува збор за компанијата која испорача најголем број батерии за електрични возила во Саудиска Арабија. Има партнерство со енергетската компанија Петромин и нејзината подружница Електромин.
Першке изјави дека нивната инвестиција ја одразува посветеноста на Саудиска Арабија за реализација на амбициозни цели поврзани со електричните возила, па дури и револуционерна промена во нејзиниот транспортен сектор, пишува Jerusalem Post.
