Сè повеќе технолошки инвеститори се селат од САД во Европа

14

Зголемен број на познати американски инвеститори во технолошкиот сектор се селат во Европа за да ги искористат предностите на подемот на стартапите на континентот.

Ова доаѓа откако проценката на неколку европски технолошки компании скокна за време на пандемијата на коронавирус. Пазарната вредност на онлајн платформата за настани Hopin се искачи на 7,75 милијарди долари две години по нејзиното основање, додека Klarna, која обезбедува услуги од типот „купи-сега-плати подоцна“, неодамна беше проценета на 46 милијарди долари.

Американските компании за ризичен капитал испраќаат вработени во Европа и вработуваат луѓе на лице место во обид да го пронајдат следниот Spotify или ASML, чија пазарна вредност се искачи на 331 милијарда долари во услови на светски недостиг на чипови.

Ветеранот Алекс Ферара, партнер во Bessemer Venture Partners, кој има инвестирано во компании како LinkedIn и Pinterest, се преселил од Њујорк во Лондон во септември, според извор на CNBC, кој побарал анонимност.

Минатиот месец, фирмата за ризичен капитал од Силиконската долина Lightspeed Ventures, која инвестираше во Snap и Epic Games, ги ангажираше Пол Марфи и Рос Мејсон да го водат нејзиното навлегување во Европа.

Марфи со седиште во Лондон е еден од првите инвеститори во Hopin, додека Мејсон, кој живее во Женева, е ко-основач на MuleSoft, кој беше купен од Salesforce во март 2018 година за 6,5 милијарди долари.

Во Лондон, Lightspeed го ангажира и Адријан Раду, поранешен партнер во инвестициската банка Qatalyst Partners, според LinkedIn. Тројцата се придружуваат на партнерката на Lightspeed, Рутис Виткаускас, која живее во Лондон од септември 2019 година.

General Catalyst, кој има инвестиции во Airbnb и Stripe, го ангажираше лондонскиот Крис Бишоф за извршен директор во мај и Џулиет Бејлин за директор во јуни, според LinkedIn.

Технолошки гигант сè уште нема

Иако Европа сè уште не може да се пофали со технолошки гигант како Apple или Amazon, континентот е дом на зголемен број технолошки компании вредни десетици или дури стотици милијарди долари, а некои луѓе мислат дека е прашање на време кога Европа ќе основа технолошка компанија со големина на американските и азиските гиганти.

„Општото мислење се промени од перцепцијата дека Европа е осудена на технолошка стагнација до фактот дека континентот сега е вистински глобален играч со компании во многу категории“, изјави лондонскиот инвеститор Хусеин Канџи за CNBC, посочувајќи ги Spotify, Klarna, Revolut и Darktrace како пример.

„Секој, кој е некој, започнува бизнис во Лондон (ова е изненадувачки големиот европски победник, иако Британија повеќе не е дел од ЕУ) или бара зделки во Европа“, рече Канџи, кој е партнер во Hoxton Ventures.

„Тоа е одлично за екосистемот бидејќи три четвртини од профитабилните компании во Европа во секој случај собираат пари од САД“, рече тој.

Sequoia, веројатно најпопуларната компанија за ризичен капитал во светот, рече дека започнала со работа во Лондон минатата година кога ветеранот партнер Мет Милер се преселил од Сан Франциско во англиската престолнина.

Инвестициската компанија, која инвестираше во Apple или Google во раните денови, сега има канцеларија во Лондон.

Sequoia има поддржано повеќе од 10 компании во Европа откако ја отвори својата канцеларија во Лондон. Сепак, вкупната инвестиција на Sequoia на континентот е значително поголема, бидејќи компанијата инвестира во Европа повеќе од една деценија, поддржувајќи ги компаниите како што се производителот на чипови Graphcore и Klarna со седиште во Стокхолм.

Хеџ фондот Coatue Management со седиште во Њујорк овој месец потврди дека планира да отвори канцеларија во Европа.

Некои флуктуации

Досега, сепак, не секој американски инвеститор во технолошкиот сектор брза да вработи вработени во Европа. Andreessen Horowitz, на пример, сè уште нема „теренски“ инвеститори во Европа.

„Компанијата склучи пет зделки во Велика Британија и Европа во последните 12 месеци со пристоен капитал, но сè уште не е подготвена да се прошири на континентот“, изјави извор на CNBC.

Двоумењето на Андреесен може да се должи на фактот дека се уште има многу можности во САД или на фактот дека работите не одат секогаш според планот кога американските инвеститори се прошируваат во Европа.

Google Ventures, сега GV, отвори канцеларија во Европа во 2015 година со пет партнери со седиште во Лондон. Сепак, работите не одеа според планот и европскиот фонд беше стопиран откако централниот во Калифорнија отфрли „многу“ инвестициски идеи на партнерите во Лондон.

GV сè уште инвестира во Европа, но сега користи глобален фонд, а бројот на партнери во Лондон е намален.