Се скратува полицискиот час во Грција, а од први јули целосно се укинува

20

Од сабота полицискиот час во Грција ќе биде пократок и ќе почнува во 01:30 часот, наместо 00:30 како што беше досега, а на угостителските објекти ќе им биде дозволено да пуштаат музика, соопшти заменик министерот за цивилна заштита на Грција, Никос Хардаљас, јави дописничката на МИА од Атина.

По позитивната препорака од комисијата на епидемиолози во Министерството за здравство, Хардаљас информираше за одлуките на Владата за дополнително олабавување на мерките.

Од сабота 12 јуни, дозволена е музика во угостителските објекти, кои и понатаму ќе работат само во надворешните делови и само за посетители кои седат на маса, а на настаните на отворено се зголемува капацитетот од 50 на 75%.

Хардаљас истакна дека од први јули полицискиот час целосно ќе биде укинат, доколку епидемиолошката слика го дозволи тоа, а исто така од први јули, на прославите дозволени се најмногу 300 гости, наместо 100 како што е сега.

Мерките кои важат во Грција се однесуваат како на грчките државјани, така и на туристите.

Фото: Pixabay