Во последните девет месеци евидентирани се 2.300 поплаки, жалби и прашања од незадоволни потрошувачи. Најголемиот дел се во доменот на сервисирањето, посебно кај технички сложените производи како машини за перење и кај мобилните телефони. Но, многу реакции од граѓани има и во однос на услугите, како и за онлајн купувањето, највеќе преку нелегалната фејсбук продажба.
Како што вели претседателката на Организацијата на потрошувачи на Македонија (ОПМ), Mаријана Лончар Велкова, системот за заштита на потрошувачите се засилува, но повеќето од нив сè уште не си ги знаат правата.
„Бројката на поплаки и жалби не е занемарлива. Ние ги процесуираме до компаниите за спорот најпрво да се реши меѓусебно. Добра волја е на продавачот, ако сте купиле денес некој производ, да ви го врати и да ви даде нов ако е неисправен. Но, ако постои сомнеж дека е ваша вината што производот не функционира, тогаш треба да оди на сервисер. Кај сервисерите има проблем – или потрошувачот дирекно им се обраќа, а трговците не знаат или трговците не можат да го поправат додека не се види од страна на сервисерот. Тука има многу проблеми. Но, проблеми има и кај технички сложените производи како машини за перење, мобилни, каде што треба да има гарантиен лист, како и кај услугите. Вториот дел поплаки се оние во однос на онлајн продажбата, фактички нелегалната фејсбук продажба која ја нарушува и фер конкуренцијата на фирмите, изјави Лончар Велкова пред презентацијата на резултатите од проектот „Развој на партнерства помеѓу граѓанското општество и бизнис секторот”.
Кај оваа продажба, нагласува, не се знае кој го продава производот, граѓаните се излажани, не знаат од кого купиле.
„Апелираме граѓаните да не купуваат на фејсбук зашто потоа се јавуваат, велат дека не можат да го вратат производот, а не може да интервенира ниту Државниот пазарен инспекторат. Едноставно, ја нема таа т.н. фирма што продавала нутрибулет, патики, „фејк” брендови или што било друго, потенцира Лончар Велкова.
Едукацијата, сепак, продолжува.
„Можеби потрошувачите не си ги знаат своите права, но ние се трудиме да ги едуцираме, нашата веб страница е исполнета со многу брошури, информации, а и во секое време може да ни се јават. Државниот пазарен инспекторат, како и другите инспекторати, е отворен во секое време, може да комуницираат. Се повеќе расте системот за заштита на потрошувачите преку институциите, регулаторите, АХВ,…. Има и кол системи, напоменува Лончар Велкова и додава дека ОПМ нема точна бројка колкаво е оштетувањето на потрошувачите. Надлежните институции на годишно ниво даваат такви информации – колку и на што се жалат граѓаните.
