Новата шефица на Twitter, Линда Џакарино, ќе преземе низа мерки за повторно да ги придобие огласувачите кои ја напуштија платформата кога ја предводеше шефот на Тесла, Илон Маск.
Според Financial Times (FT), Џакарино ќе воведе нови видео реклами на Twitter, ќе вработи повеќе познати личности и ќе го зголеми бројот на вработени, пренесува Reuters.
Корисниците на Twitter ги очекува нов тип на видео реклама – на цел екран и со вклучен звук – што ќе им се прикажува додека гледаат кратки видео содржини на платформата, објави FT, повикувајќи се на три добро информирани извори.
Според друг извор, Џакарино преговара за проширување на партнерството на Twitter со Гугл. Twitter преговара и за нов тип на соработка со компании како Amazon, Salesforce и IBM.