Шефот на Bosch: Побарувачката за полупроводници далеку го надминува производствениот капацитет

31

Шокот во понудата на полупроводници предизвикан од пандемијата Ковид-19 е надминат, но побарувачката сè уште далеку ги надминува производствените можности, предупреди во средата шефот на германската технолошка групација Bosch.

„Се појавија еднократни проблеми со кои се справивме“, рече Волкмар Денер на конференцијата за автомобилската индустрија организирана од автомобилскиот магазин „Automobilwoche“.

„Сега се соочуваме со структурен дефицит, побарувачката далеку го надминува производствениот капацитет“, објасни Денер.

Bosch е клучен снабдувач на автомобилската индустрија и планира да инвестира повеќе од 400 милиони евра во производство на микрочипови во родната Германија и Малезија следната година, а најголемиот дел од сумата е резервиран за забрзано проширување на фабриката за чипови во Дрезден.

Денер признава дека тие се потпираат и на подизведувачи во производството на некои чипови и сензори, па затоа не се заштитени од прекини во синџирите на снабдување.

„Можеме да го намалиме притисокот во синџирот на снабдување кога станува збор за производите што самите ги правиме, но сензорот на Bosch има многу делови што ги купуваме од други“, објасни тој.

Силната побарувачка за чиповите се одрази на резултатите на компаниите што ги произведуваат, а германски „Infineon“ денеска објави дека неговата добивка во фискалната година што заврши во септември тројно се зголемила на 1,17 милијарди евра.

Нејзините приходи се зголемени за 29 отсто, на 11,1 милијарди евра.

Во новата фискална година треба да се зголеми на околу 12,7 милијарди евра, според Infineon.

„Со оглед на континуираната голема побарувачка за полупроводници кои се неопходни за светот да биде енергетски ефикасен и меѓусебно поврзан, очекуваме фискалната 2022 година да биде многу добра“, рече извршниот директор Рајнхард Плос.