Претседателот на Бундесбанката, Јоаким Нагел, посочи дека Европската централна банка (ЕЦБ) оваа година треба неколкукратно да ја зголеми основната каматна стапка.
„На состанокот во јуни, мора да дадеме јасен сигнал за тоа каде одиме“, рече Нагел во интервју за германскиот магазин Der Spiegel, пренесува SEEBiz.
„Од моја гледна точка денес, треба да го направиме првиот чекор во однос на каматната стапка во јули и да оставиме други да следат во втората половина од годината“, рече тој.
Претседателката на ЕЦБ Кристин Лагард во понеделникот ги претстави изгледите за елиминирање на негативните каматни стапки до крајот на август. Целта е првата промена на каматната стапка во јули.
Финансиските пазари овие изјави ги толкуваа како показател за првото зголемување на стапката од 0,25 процентни поени. Оттогаш, некои членови на управниот совет на ЕЦБ повикаа на поголемо зголемување на стапката од 0,5 отсто во јули. Сепак, се чини дека овој потег нема мнозинство во Советот.
Голем број западни централни банки, вклучително и Федералните резерви на САД, веќе почнаа да го поништуваат намалувањето на каматните стапки.
Претседателот на Бундесбанката не очекува остар пад на стапката на инфлација, која во Германија, како и во еврозоната, неодамна изнесуваше 7,4 отсто.
„Инфлацијата нема да падне преку ноќ, може да потрае некое време. Важно е долгорочните инфлациски очекувања да бидат добро закотвени“, рече тој.
