Европската централна банка ќе почне да ги намалува каматните стапки кога ќе се увери дека инфлацијата се вратила на целта од два отсто, изјави претседателката на ЕЦБ, Кристин Лагард.
„Не можам да го прецизирам точниот датум кога ќе започнат кратењата“, изјави Лагард во интервјуто за ТВ Франс 2 во четвртокот, додавајќи дека ќе има нови податоци во наредните месеци и ќе донесе одлука врз основа на нив, пренесува Блумберг.
Инвеститорите сметаат дека првото намалување на каматните стапки би можело да се случи веќе во април, додека креаторите на монетарната политика сметаат дека е пореално тоа да се случи кон средината на оваа година.
Говорејќи претходно во четвртокот, шефот на хрватската централна банка Борис Вујчиќ рече дека пазарите сè уште се премногу оптимисти за времето на првото намалување, повторувајќи ги коментарите на членот на Извршниот одбор Изабел Шнабел претходниот ден, која ги нарече разговорите на оваа тема предвремени.
И покрај тоа што инфлацијата остана под три проценти дури и по порастот во декември, претставниците на ЕЦБ сакаат да видат податоци за зголемувањето на платите што ќе дојде дури по првиот квартал.
Лагард рече дека Европа не е во сериозна рецесија и дека најлошата борба против инфлацијата е завршена.
