На Волстрит, индексот S&P 500 достигна нов рекорден максимум во четврток, благодарение на силниот раст на цените на акциите на неколку технолошки гиганти и довербата на инвеститорите дека Фед наскоро ќе ги намали каматните стапки.
Дау Џонс доби 0,77 проценти, на 45.621 поен, додека S&P 500 порасна за 0,83 проценти, на 6.502 поени, а индексот Nasdaq за 0,98 проценти, на 21.707 поени.
Новиот рекорд за S&P 500 е најмногу благодарение на зголемувањето на цените на акциите на неколку технолошки гиганти, како што се Amazon, Broadcom и Meta Platforms.
Така, индексите го продолжија својот позитивен тренд, кој трае со месеци, бидејќи инвеститорите очекуваат дека американската централна банка ќе ги намали каматните стапки за 0,25 процентни поени на својата седница во средината на септември.
Лидери на ФЕД во последните денови велат дека тоа е можно поради слабоста на пазарот на трудот.
А точната состојба на американскиот пазар на трудот ќе ја покаже во петок извештајот за вработеноста, кој би можел значително да влијае на насоката на пазарот.
Доколку податоците покажат дека пазарот на трудот продолжува да слабее, речиси е сигурно дека ФЕД ќе ги намали каматните стапки во септември.
Доколку, пак, податоците покажат силен раст на вработеноста, не е сигурно дека централната банка ќе ги намали каматните стапки.
Тогаш одлуката на ФЕД би можела да биде под влијание на новите податоци за инфлацијата, кои ќе бидат објавени следната недела и кои ќе покажат дали царините, кои неодамна ги воведе американскиот претседател Доналд Трамп, предизвикаа значително зголемување на потрошувачките цени.
Цените на акциите, исто така, пораснаа на повеќето европски берзи вчера. Лондонскиот индекс FTSE порасна за 0,42 проценти, на 9.216 поени, додека франкфуртскиот DAX порасна за 0,74 проценти, на 23.770 поени. Сепак, парискиот CAC ослабе за 0,27 проценти, на 7.698 поени.