Симболиката на мостот на Иво Андриќ помеѓу Србија и РС Македонија преточена во туристичка соработка

27

Целокупниот настап на Агенцијата за промоција и поддршка на туризмот заедно со македонските општини и претставниците од туристичкиот сектор на 43-от меѓународен саем за туризам “SAJAM TURIZMA” во Белград е уште една успешна туристичка приказна, а за која резултатите ќе ги видиме во сезонава што следи. “Очекувањата се зголемување на српските туристи во туристичките региони каде што се нудат туристички продукти и туристички содржини за поврзување на српските и македонските патувачи. Српските туристи во РС.Македонија освен Охрид го посетуваат и винскиот регион каде што уживаат во македонските вина и гастрономијата, зголемена посета на Демир Капија, Гевгелија и Дојран, зимските центри и главниот град Скопје”- изјави директорот на Агенцијата за промоција и поддршка на туризмот, д-р Љупчо Јаневски.
Директорот на Агенцијата за промоција и поддршка на туризмот д-р Љупчо Јаневски и вд амбасадорот на Република Северна Македонија во Република Србија, Михаела Веселинов се сретнаа со министерот за туризам на Република Бугарија и амбасадорот на Бугарија во Република Србија на македонскиот изложбен простор. Се потенцираше потребата од сезонска линија на релација Софија-Охрид, зголемување на соработката во делот на реализација на информативни патувања на новинари, блогери и инфлуенсери за промовирање на туристичките потенцијали, зголемување на промоцијата и повеќе туристи во 2022 година од двете дестинации.

Директорот на АППТ, д-р Љупчо Јаневски оствари средба со директорката на Нацинална туристичка организација на Србија, Марија Лабовиќ, а на која се потенцираше зголемениот број на српски и македонски туристи помеѓу двете држави во ова време на кризи. Зголемениот проток на туристи меѓу двете земји може да ја воочи потребата од враќање на конекцијата Белград-Охрид-Белград, се мисли на сезонска авиолинија која во минатото многу добро функционирала. Се договори реализација на две информативни патувања во месеците април и мај, едно во Србија со посета на еминентни туристички новинари од нашата земја и друго за промоција на Охрид и останати туристички региони со посета на српски туристички блогери.
Разговорот на директорот Јаневски и амбасадорот на Република Чешка во Белград, Томаш Кучта се водеше во насока на реализација на проекти за велосипедски тури за чешки туристи во РС Македонија. Со директорката за развојните политики во туризмот, Александра Гардашевиќ Славуљица при министерството за економија на Црна Гора се разменија мислења за активности поврзани со заздравување на туризмот од кризата и искористување на потенцијалите кои веќе им се достапни на државите.

Јаневски оствари средби со повеќе Европски фондации за вклучување на РС Македонија во културни тури, како на пример римските патишта кои би значеле повеќе туристи во регионите кои нудат сегментирани туристички понуди. Директорот Јаневски на состанокот со Роберто Радиќ, маркетинг директор на интернационалната саемска манифестација Place2Go кој се одржува во Хрватска се разговараше за иден настап на АППТ на овој традиционален туристички пазар.
Агенцијата за туризам и нејзините претставници остварија состаноци со национални туристички организации на Белград, Ниш и Нови Сад, а на кои се разговараше за искористување на можностите на иницијативата “Отворен Балкан” во делот на што поголема туристичка размена на патувачи. Македонско–српското пријателство, историските и традиционалните врски, заедничките вредности и интереси се одразуваат и во зацврстување на воспоставените туристички релации меѓу РС Македонија и Србија.

За поздравување е потпишувањето на меморандумот за соработка помеѓу Дојран и Вишеград, Белград беше мост за соработка помеѓу две општини од Босна и Херцеговина и РС Македонија. Овој чин беше поздравен од угледниот адвокат Тома Фила, кандидат за градоначалник на Белград, во кој македонците ја препознаваат симболиката на мостот на Иво Андриќ помеѓу Србија и РС Македонија. Директорот Јаневски во истата прилика му посака успех на господинот Фила, потсетувајќи го дека и младите генерации знаат за неговите дела и неговиот придонес за Скопје.