Состојба на берзите: „Пазарот е како дете кое бара сладолед, а родителот вели не“

58

Цените на акциите на светските пазари силно се зголемија во првата недела од 2023 година, бидејќи инвеститорите беа охрабрени од намалувањето на инфлациските притисоци во САД и во еврозоната, што може да ги поттикне централните банки наскоро да го прекинат циклусот на зголемување на каматите.

На Волстрит, Dow Jones зајакна 1,5 отсто, на 33.630 поени, а S&P 500 порасна со иста стапка, достигнувајќи 3.895 поени. Индексот Nasdaq, пак, зајакна 1 отсто и ја заврши неделата на 10.569 поени.

Во декември бројот на вработени во САД се зголемил за 223.000
Најголемата светска берза се тргуваше неизвесно до петокот, кога беа објавени податоците за вработеноста и платите во САД.

Во декември бројот на вработени се зголемил за 223.000, нешто повеќе од очекуваното, додека платите пораснале за 0,3 отсто на месечно ниво, помалку од очекуваното.

Дополнително, беше објавено дека активностите во услужниот сектор паднале во декември за прв пат по повеќе од две и пол години.

Благодарение на забавувањето на растот на платите, а со тоа и на инфлаторните притисоци, во петокот берзанските индекси скокнаа за повеќе од 2 отсто, ги надоместија сите загуби од претходните денови и ја завршија неделата во позитива.

Имено, инвеститорите се надеваат дека каматните стапки на крајот од циклусот на покачување ќе бидат пониски од проценките на челниците на ФЕД и дека централната банка ќе почне да ги намалува каматните стапки уште оваа година, иако ФЕД сигнализираше дека тоа би можело да го направи само во 2024 година.

„Пазарот е како дете кое бара сладолед“
Иако записникот од последната седница на ФЕД минатата година не ги поддржа тие надежи, цените на акциите пораснаа.

„Пазарот е како дете кое бара сладолед. Родителите велат „не“, но детето продолжува да бара сладолед бидејќи родителите порано попуштале. Така, пазарот сè уште очекува да добие сладолед, но не толку брзо како што мислеше“, објаснува Барнс Мекини, менаџер на портфолио во NFJ Investment Group LLC.

Мекини верува дека евиденцијата покажува дека претставниците на ФЕД стравуваат дека несоодветното олеснување на финансиските услови ќе ги искомплицира нивните напори за борба против инфлацијата.

Тој, исто така, истакнува дека е јасно дека ФЕД ќе го забави темпото на поскапување на парите за да не ја турне економијата во рецесија, но дека може да се очекува каматните стапки да останат покачени подолго од претходно очекуваното.

„Сè е исто како минатата година“
Мајк Ловенгарт, директор за портфолија во глобалната инвестициска канцеларија на Морган Стенли, верува слично.

„Записниците на ФЕД се потсетник за инвеститорите да очекуваат повисоки каматни стапки во текот на оваа година. Со оглед на тоа што пазарот на трудот е сè уште силен, има смисла дека борбата против инфлацијата останува приоритет на ФЕД. Со други зборови, иако го сменивме календарот, спротивните ветрови на пазарот остануваат исти како лани“, вели Ловенгарт.

Минатата година, S&P 500 потона за повеќе од 19 отсто, најмногу од глобалната финансиска криза во 2008 година, бидејќи ФЕД агресивно ги зголеми каматните стапки за да ја ограничи инфлацијата, која го достигна највисокото ниво во повеќе од 40 години на средината на годината.

Олеснување на инфлацијата во еврозоната
И на европските берзи цените на акциите силно пораснаа минатата недела. Индексот STOXX 600 на водечките европски акции скокна за 3,4 отсто.

Истовремено, лондонскиот FTSE индекс порасна за 3,3 отсто, на 7.699 поени, додека франкфуртски DAX скокна за 4,9 отсто, на 14.610 поени, а париски CAC речиси 6 отсто, на 6.860 поени.

Силниот раст на индексот е благодарение на податоците кои ги поттикнаа надежите дека падот на производствената активност во еврозоната го допре дното и дека може да започне закрепнување.

Инвеститорите беа охрабрени и од податоците за намалувањето на инфлациските притисоци во еврозоната втор месец по ред, што може да ја натера Европската централна банка да го забави темпото на зголемување на каматните стапки.

Берзите се поддржани и од надежта на инвеститорите дека растот на кинеската економија наскоро ќе се забрза, имајќи предвид дека локалните власти забрзано ги олеснуваат рестриктивните мерки за коронавирусот.

Многу болници и гробишта известуваат дека се под притисок поради големиот број заразени и починати од Ковид, но инвеститорите се надеваат дека штом ќе помине бранот зараза, животот и потрошувачката ќе се вратат во нормала, па не обрнуваат внимание на актуелните проблеми.

Дотолку повеќе што кинеската централна банка најави дека ќе обезбеди финансиска поддршка за домашната потрошувачка, клучните инвестициски проекти и пазарот на недвижности.

„Повторното отворање на Кина има големо влијание низ целиот свет. Тоа го поттикнува туризмот и потрошувачката и може да ги отстрани тесните грла во синџирите на снабдување, кои им предизвикаа проблеми на производителите во 2022 година“, вели Џоан Го, аналитичар во DBS Bank.