Европските берзански индекси денес малку пораснаа, како и цените на нафтата, златото и пченицата, но инвеститорите остануваат претпазливи и покрај тоа што Кина и САД постигнаа прелиминарен трговски договор во Лондон.
По дводневни разговори, претставници од двете земји се согласија за рамка за спроведување на таканаречениот Женевски консензус, што доведе до намалување на царините минатиот месец. Сепак, на објавата ѝ недостасуваа конкретни детали, а рамковниот договор сè уште чека на одобрување од претседателот Доналд Трамп и Си Џинпинг.
Ограничувањата на Кина за извоз на ретки земни елементи во Соединетите Американски Држави се „фундаментален дел“ од најновиот договор и Вашингтон очекува прашањето да биде решено во разговорите, изјави за новинарите американскиот министер за трговија Хауард Лутник.
Тој посочи дека ограничувањата на САД за продажба на напредна технологија во Кина, воведени во последните недели, ќе бидат укинати откако Пекинг ќе го одобри извозот на ретки земни елементи, објави CNN.
Индексот DAX на Франкфуртската берза падна за 0,15 проценти на 23.984,78 поени во 9:45 часот наутро денес, додека францускиот CAC 40 се зголеми за 0,24 проценти на 7.819,32 поени, лондонскиот FTSE 100 за 0,11 проценти на 8.863,25 поени, а московскиот MOEX за 0,51 процент на 2.736,36 поени.
Вредноста на американскиот берзански индекс Dow Jones порасна за 0,25 проценти на 42.866,87 поени, индексот S&P 500 за 0,55 проценти на 6.038,81 поени, а вредноста на индексот Nasdaq за 0,63 проценти на 19.714,99 поени.
Европските фјучерси за гас за јули беа продадени на отворањето на берзата TTF по цена од 34,845 евра за мегават-час.
Според моменталните податоци од берзата, цената на суровата нафта се искачи на 65.212 долари, а цената на нафтата од типот Брент се искачи на 66.988 долари.
Цената на златото се искачи на 3.339,28 долари за унца, а цената на пченицата на 5,3836 долари за бушел (еден бушел е еднаков на 27,216 кг).
Вредноста на еврото во однос на доларот на берзата Форекс е 1,14124, што е за 0,11 проценти помалку отколку на почетокот на тргувањето.
Фото: Pixabay