Со неговата смрт, светот се простува од духовен водач кој ја трансформираше улогата на Католичката црква во современото општество. Папата Франциск не беше само поглавар на повеќе од милијарда верници, туку и гласен борец за сиромашните, маргинализираните и животната средина. Од неговото изборување во 2013 година, па сè до последниот здив, тој ја водеше Црквата со едноставност, скромност и непоколеблива посветеност на социјалната правда. Неговите пораки ја надминуваа верата – тие беа повик за хуманост во време на економски, еколошки и морални предизвици.
Церемонијата ќе започне во 10 часот на плоштадот Свети Петар, а потоа поворката ќе се движи низ Рим до базиликата Санта Марија Маџоре, каде што ќе биде погребан папата.
На погребот ќе присуствуваат претседателката Гордана Сиљановска Давкова, италијанската премиерка Џорѓа Мелони, американскиот претседател Доналд Трамп, претседателката на Европската комисија Урсула фон дер Лајен, францускиот претседател Емануел Макрон, како и српскиот премиер Ѓуро Макут.
Освен тоа, утре во Рим ќе престојуваат украинскиот претседател Володимир Зеленски, претседателот на родната Аргентина на папата Хавиер Мајли, како и британскиот премиер Кир Стармер и принцот Вилијам, кој ќе го претставува неговиот татко, кралот Чарлс.
Папата Франциск почина во понеделникот на 21 април од срцева слабост и мозочен удар, по битката со пневмонија поради која беше хоспитализиран.
Борбата против економската нееднаквост
Од почетокот на неговиот понтификат во 2013 година, папата Франциск воведе револуционерни промени во ставот на Католичката црква кон глобалната економија, социјалната правда и грижата за сиромашните. Неговите одлуки и изјави честопати предизвикуваа контроверзии во деловниот свет, но во исто време ги поставија темелите за похуман пристап кон економијата на 21 век.
Папата Франциск постојано нагласуваше дека 50-те најбогати луѓе во светот имаат богатство од 2,2 трилиони долари, што би било доволно за финансирање на здравствената заштита и образованието на сите сиромашни деца во светот. Тој особено ги критикуваше економските теории „надолу“, истакнувајќи дека тие никогаш не се докажани во пракса и претставуваат „наивна доверба во добрината на оние што ја имаат економската моќ“.
Преку иницијативата „Економија на Франческо“, именувана по Свети Франциск Асишки, Папата собра над 2.000 млади економисти и претприемачи за да развијат алтернативи на сегашниот глобален економски систем. Целта е да се создаде економија што ги става луѓето пред профитот, се грижи за животната средина, обезбедува фер распределба на ресурсите и промовира солидарност пред конкуренцијата.
Во соработка со Меѓународниот монетарен фонд, папата Франциск започна иницијативи за намалување на долговите на сиромашните земји, регулирање на даночните оази, пофер распределба на глобалните ресурси и реформирање на меѓународниот финансиски систем.
Заштита на работниците и животната средина
Папата посвети посебно внимание на врската помеѓу економијата и екологијата, што кулминираше во енцикликата „Laudato Si’“. Во неа, тој нагласува дека е невозможно да се реши проблемот со сиромаштијата без истовремено решавање на еколошката криза. Се залага за „социјална пазарна економија“ што вклучува три клучни столба: државата како регулатор, капиталот и трудот.
Економските иницијативи на Папата претставуваат радикално отстапување од традиционалниот пристап на Црквата кон економските прашања. Преку дијалог со меѓународните институции, повици за конкретни акции и критики на постојниот систем, папата Франциск ги постави темелите за создавање пофер и поодржлив економски поредок кој ги става човекот и животната средина во центарот на своите интереси.