На Волстрит берзанските индекси минатата недела достигнаа ново рекордно ниво, а пораснаа и цените на акциите на европските берзи, откако Европската централна банка по трет пат оваа година ги намали клучните каматни стапки.
На Волстрит, Dow Jones минатата недела зајакна за 1 отсто, на 43.275 поени, додека S&P 500 порасна за 0,9 отсто, на 5.864 поени, а индексот Nasdaq зајакна 0,8 отсто, на 18.489 поени.
Новите рекорди на Dow Jones и S&P 500 индексот беа најмногу благодарение на подобрите од очекуваните квартални деловни резултати на големите американски банки и голем број компании, меѓу кои и Netflix.
Досега повеќе од 70 компании и банки од индексот S&P 500 ги објавија финансиските извештаи за третиот квартал, при што за околу 75 отсто ги надминаа очекувањата на аналитичарите.
Инвеститорите охрабрени
Инвеститорите беа охрабрени и од новите макроекономски податоци, кои ги отстранија стравувањата од рецесија. Минатата недела, имено, беше објавено дека потрошувачката на мало во САД се зголемила за 0,4 отсто во септември, нешто повеќе од очекуваното.
Тоа, како и податоците за неочекуваниот пад на бројот на барања за помош за невработените, покажуваат дека најголемата светска економија постојано расте.
Овие податоци го зајакнаа уверувањето на инвеститорите дека економијата ќе избегне рецесија, но и дека американската централна банка нема да продолжи со нагло намалување на каматните стапки, откако неодамна ги намали за агресивни 0,50 процентни поени.
Сега пазарот проценува дека има околу 90 проценти шанси ФЕД да ги намали каматните стапки за 0,25 процентни поени во ноември, а околу 10 проценти воопшто да не ги менуваат.
ЕЦБ ги намали каматните стапки по трет пат оваа година
И на европските берзи цените на акциите пораснаа минатата недела. Лондонскиот FTSE индекс зајакна 1,3 отсто, на 8.358 поени, додека франкфуртски DAX порасна за 1,5 отсто, на 19.657 поени, а париски CAC за 0,5 отсто, на 7.613 поени.
Инвеститорите беа охрабрени од Европската централна банка, која минатата недела по трет пат годинава ги намали каматните стапки за 0,25 процентни поени, што треба да го стимулира економскиот раст.
