IBM ги повлече сите реклами од платформата X во сопственост на Илон Маск, откако беше објавено дека социјалната мрежа ги објавила рекламите на технолошката компанија заедно со пронацистичка содржина.
Левичарската непрофитна организација Media Matters објави извештај во кој се вели дека открила реклами од големи брендови, вклучително и IBM, Apple, Oracle и Comcast’s Xfinity и Bravo, заедно со содржини што „го промовираат Адолф Хитлер и неговата нацистичка партија“, пренесува Танјуг.
Во едно видео, организацијата покажа реклама на Oracle под објава со фотографија од Хитлер и неговиот цитат за „вистината“. Друга слика од екранот покажува реклама на Xfinity под објава што го велича Третиот Рајх.
„IBM има нулта толеранција за говор на омраза и дискриминација и веднаш го прекинавме целото рекламирање на платформата X додека ја истражуваме оваа целосно неприфатлива ситуација“, велат од компанијата, како што објави Фајненшл тајмс.
