Компанијата Тесла планира во својата фабрика во близина на Берлин да произведе автомобил кој ќе чини 25.000 евра, тврдат неименувани извори од американската компанија.
Извршниот директор на компанијата Илон Маск минатата недела ја посети фабриката во Груенхајде и му се заблагодари на вработените за нивните напори, што беше прикажано на платформата X. Тој на состанокот го информираше персоналот за плановите за производство на возилото од 25.000 евра.
Германската фабрика моментално го произведува Model Y, најпродаваниот електричен автомобил во Европа. Маск долго време планира да направи подостапен електричен автомобил, но минатата година изјави дека компанијата сè уште не ја совладала потребната технологија, поради што планот се одложува.
Масовното проширување на пазарот е клучно за целта на Tesla да ги зголеми испораките на возила на 20 милиони до 2030 година, 10 пати повеќе од сегашниот капацитет. Слабата економија и високите каматни стапки ја погодија побарувачката за електрични автомобили, што ја натера Тесла и другите производители да ги намалат цените.
Tesla планира да го удвои капацитетот на германската фабрика на еден милион возила годишно, но компанијата од март не дава прецизни информации колку возила произведува во Груенхајде.
