Tesla се бори да го зголеми производството во Германија

22

Извршниот директор на Tesla Inc. Елон Маск на последната конференција за финансиските резултати на американскиот концерн за електрични автомобили призна: зголемувањето на производството во гигафабриката во Грунхајде останува предизвик.

Според планот, зголемувањето на производството ќе му помогне на објектот на Tesla во близина на Берлин да влезе во т.н оперативна фаза, пишува Automobilwoche.

Во моментов, Tesla произведува само 86 електрични автомобили Model Y Performance дневно.

Податоците за дневното производство покажуваат дека до крајот на април, Tesla планирала да испорачува 1.000 електрични автомобили неделно. На крајот, Automobilwoche објави дека компанијата успеала да комплетира 350 Model Y во последната недела од месецот, правејќи 70 единици дневно.

Меѓу причините за неусогласеноста во целите се проблемите со квалитетот – готовите возила треба да се преработат – како и немањето доволно кадар.

Министерот за економија на Бранденбург, Јерг Штајнбах, неодамна објави дека „нешто повеќе од 4.000 вработени“ веќе работат во фабриката.

Целта на Tesla е да произведува 500.000 автомобили годишно во Бранденбург и да има 12.000 работници.

Производството на погонски системи се очекува да започне во Грунхајде во јуни, а темпото би требало значително да се зголеми од втората половина на годината. Овие системи моментално се увезуваат од Кина, каде што се произведуваат во фабриката на Tesla во Шангај. Сепак, блокадите на градските власти поради коронавирусот го попречуваат производството.

Производството во Грунхајде започна на крајот на март. Automobilwoche проценува дека компанијата нема да може да произведе повеќе од 30.000 автомобили во 2022 година.

За Маск, времето е од суштинско значење бидејќи побарувачката ја надминува понудата, а тој си постави за цел да постигне годишен раст на производството од најмалку 50%.

JPMorgan проценува дека новата фабрика ќе може да произведе околу 54.000 возила во 2022 година и 280.000 во 2023 година. Банката очекува годишното производство да се зголеми на планираните 500.000 во 2025 година.

Tesla гради и капацитет за производство на батерии. Плановите се амбициозни, а локалните работнички организации го поздравија отворањето на фабриката. Сепак, во однос на работните услови, Tesla заостанува зад другите германски работодавци, според Биргит Дице, претставник на локалниот синдикат.

„Компанијата која се залага за високи еколошки стандарди мора да се фокусира и на високи социјални стандарди со соодветно добри работни услови“, додаде Дице.