Европа нема да се соочи со недостиг на гас оваа зима, но ќе мора да плати повеќе за да обезбеди доволно снабдување, изјави извршниот директор на францускиот енергетски гигант „Тотал Енерџис“.
Тој спомена дека Европската Унија (ЕУ) мора да ја преиспита својата политика за складирање на гас.
„Европската грешка оваа година, особено во однос на гасот, е што ги олабавивме барањата за капацитет за складирање една година прерано, што нè наведе да влеземе оваа зима со помали резерви. Ова, секако, ја зголемува тензијата“, ги пренесува Ројтерс зборовите на Патрик Пујане од презентацијата на енергетските прогнози на компанијата.
Европа е во пазарна конкуренција со Азија за снабдување со течен природен гас (LNG) бидејќи се обидува да ги наполни складиштата пред зимата во контекст на неизвесноста околу продолжувањето на израелско-американската војна со Иран и нејзиното влијание врз извозот на LNG од Катар, еден од најголемите добавувачи во светот.
Геополитичката ситуација ги зголеми цените на гасот во текот на летото, кога трговците вообичаено купуваат гас за да ги наполнат складиштата.
Европската агенција за регулирање на енергијата ACER објави уште во април дека ќе биде тешко да се наполнат складиштата до ниво од 90 проценти поради состојбата на глобалниот пазар и дека земјите наместо тоа треба да се стремат кон ниво од 80 проценти што го дозволуваат правилата на ЕУ во случај на нарушени пазарни околности.
На 1 ноември, складиштата во Германија беа полни само 61 процент, што е значително под европскиот просек од 75 проценти.