Се очекува Руперт Мердок и неговиот син Лаклан да бидат дел од група инвеститори кои се обидуваат да го купат TikTok во САД, изјави претседателот Доналд Трамп.
Во интервју за Fox News кое се емитуваше во неделата, Трамп рече дека тие „веројатно“ ќе бидат вклучени во предложениот договор што ќе го задржи TikTok во САД.
Исто така, пишува Би-Би-Си, тој изјавил дека претседателот на „Оракл“, Лари Елисон, и основачот на „Дел“, Мајкл Дел, би можеле да бидат дел од споменатата група инвеститори.
„Мислам дека тој ќе заврши навистина добра работа“, рече Трамп.
Претседателот, кој разговараше со својот кинески колега претходно, рече дека САД и Кина напредуваат во договорот за продажба на американскиот бизнис на социјалната мрежа на американски инвеститори.
Продажбата е потребна поради законодавството донесено од Конгресот во април 2024 година, кое би ја забранило апликацијата освен ако нејзината кинеска матична компанија, „БајтДенс“, не го продаде својот американски огранок.
Законот беше предложен поради стравувањата дека Пекинг би можел да пристапи до личните податоци на 170 милиони американски корисници на „ТикТок“. Неговата имплементација е во тек додека не се постигне договор.