Цената на барелот на лондонскиот пазар минатата недела падна за 3,6 отсто, на 73,85 долари, додека на американскиот пазар цената на барелот се намали за 3,7 отсто, на 69,16 долари.
Падот на цените уследи во вториот дел од неделата, откако претседателот на американската централна банка, Џером Пауел, во извештајот до Конгресот за економската ситуација рече дека веројатно ќе треба дополнително да се зголемат каматните стапки за да се потисне инфлацијата.
Колку? Тоа, рече Пауел, ќе зависи од идните економски показатели, а во врска со шпекулациите дека ФЕД може да започне со намалување на каматните стапки на крајот на годината, Пауел рече дека не очекува толку брзо да се намалат каматните стапки.
Бидејќи инфлацијата во западните економии продолжува на високи нивоа, другите централни банки продолжуваат да ја зголемуваат цената на парите.
Минатата недела британската и норвешката централна банка ги изненадија инвеститорите со поагресивно од очекуваното зголемување на клучните каматни стапки, за 0,50 процентни поени.
Швајцарската централна банка исто така ги зголеми каматните стапки, а се очекува дополнително зголемување на каматните стапки во еврозоната.
Ова секако дополнително ќе го забави растот на економиите, а тоа, пак, ќе ја ослаби побарувачката за нафта.
Покрај тоа, економијата на Кина, најголемиот увозник на нафта во светот, не закрепнува толку брзо како што се очекуваше по укинувањето на рестриктивните мерки за коронавирусот, што предизвикува загриженост за побарувачката.
Стравувањата од рецесија и загриженоста за побарувачката ја засенија најавата на Саудиска Арабија дека ќе го намали производството за еден милион барели дневно во јули.
По минатонеделниот пад, цените на нафтата ги продолжија загубите оваа година. Во однос на почетокот на годината се во минус за околу 14 отсто.
