Цените на нафтата потонаа за повеќе од 7 отсто минатата недела

21

На светските берзи цените на нафтата драстично паднаа минатата недела бидејќи се очекува дополнително забавување на растот на светската економија, имајќи предвид дека централните банки нема да брзаат со намалување на каматните стапки.
На лондонскиот пазар цената на барелот минатата недела потона за 7,4 отсто, на 77,33 долари, додека на американскиот пазар цената на барелот падна за 7,3 отсто, на 72,28 долари.

Откако скокнаа за повеќе од 6 проценти пред една недела, тие ги загубија сите тие придобивки минатата недела.

Ова е резултат на избледените надежи дека централните банки на западните земји наскоро ќе почнат да ги намалуваат каматните стапки, што би го поддржало растот на економиите.

На минатонеделниот состанок челниците на американската централна банка очекувано ги оставија каматните стапки непроменети во опсег од 5,25 до 5,50 отсто.

Но, во соопштението наведоа дека не очекуваат намалување на каматните стапки додека не се уверат цврсто дека инфлацијата постојано се намалува кон целното ниво од 2 отсто.

Поради ова, надежите на инвеститорите дека ФЕД веќе во март ќе почне да ги намалува каматните стапки целосно избледеа.

Исто така, се чини дека каматните стапки ќе останат покачени подолг период од очекуваното, со оглед на најновите податоци кои покажуваат дека пазарот на труд во САД останува силен. Имено, тоа значи дека потрошувачката, а со тоа и притисоците врз инфлацијата, ќе продолжат да се зголемуваат.

И претставниците на Европската централна банка велат дека нема да брзаат со намалување на каматните стапки бидејќи инфлацијата во еврозоната сè уште е над целните нивоа.

Поради оваа причина се очекува дополнително забавување на растот на економиите на Америка и еврозоната, па тешко е да се очекува зајакнување на побарувачката на нафта.

Дотолку повеќе што растот на кинеската економија, најголемиот светски увозник на нафта, исто така забавува. Минатата недела Меѓународниот монетарен фонд објави проценка дека растот на кинеската економија годинава ќе забави на 4,6 отсто, од минатогодишните 5 отсто.

Конфликтите на Блискиот Исток минатата недела не се одразија значително на цената на нафтата бидејќи немаше дополнителни нарушувања во понудата на „црното злато“.